Erromeriak, bertso-saioa eta afariak izango dira aurten ere Argiñetako Kofradia jaietan

Elorrioko Argiñetako Kofradia jaiak uztailaren 31n abiatuko dira eta aurten ere erromeriak, afariak, bertsolariak eta bestelako ekitaldiekin osatuko dute egitaraua. Lehen eguneko egitaraua  entsalada, txuleta, tripaki, odoloste, piper eta sasoiko jakiekin prestatutako afariekin eta Dantzadi taldearen erromeriarekin hasiko da. 

Abuztuaren 1ean ospatuko duten Kofradiaren eguna, goizeko 12.30etako mezarekin hasiko da eta honen ostean Kofradiako kideek ohiko bazkaria egingo dute. Arratsaldean auzoko trikitilarien ekitaldia egongo da eta gauean ohiko afariez gain, Kaixo taldearen erromeria eta 23.30ean bolo txapelketa hasiko da, lehiaketa honetako onenek 400 euro eta txapela, 200 euro eta 100 euroko sariak eskuratuko dituztela.  

Eguerdian izango den eliza ospakizunarekin hasiko dira igandeko ekitaldiak eta arratsaldean Itziar Gamero kontu kontalariak ipuin saioa eskainiko du. Gauean berriz, Eneko Abasolo ‘Abarkas’, Onintza Enbeita eta Beñat Ugartetxea bertsolarien ekitaldia egongo da.

Ohikoa denez astelehenean amaituko dira Argiñetako Kofradiaren jaiak eta 12.30ean meza izango da eta ondoren paella jana, bertaratzeko txartelak 20 euroren truke salduko dituztela. Aurtengo ospakizunak 22.30ean hasiko den Dj Alexen saioarekin osatuko dira.