Artzain-txakur erakustaldia izango da lehenengoz Atxondoko Santixauetan

Atxondoko Santixau auzoko jaietan ohiko gastronomia eta karta txapelketaz gain, lehenengoz egiten den Artzain-txakur, ardi eta abarren erakustaldia ere izango dute aurten. Saioa igandean izango da, uztailak 26, meza nagusiaren ostean.

Aurtengo jaiak ohiko patata tortilla txapelketak izango dituen bi lehiaketekin hasiko dira gaur, uztailak 24, iluntzeko zortzietan. Lehengo lehiaketa patatak hobeto nork zuritu izango da eta lana hobeto egiten duenak Etxoste jatetxean bi pertsonendako afaria irabaziko du. Zuritutako patatekin egingo diren txapelketaren irabazleak berriz, sari berezia lortuko du.

Jaien lehen eguneko egitaraua txopoa jasotzeaz, tortillekin egingo diren afariekin eta kantu-karaokearekin ostuko da.

Larunbatean ospatuko duten Santixau Eguneko egitaraua goizeko 11.30ean abiatuko da meza nagusiarekin eta ostean Andasto dantza taldeak eskainiko duen ekitaldiarekin. Ondoren oilasko-paella txapelketa hasiko da eta 14.00ak aldera prestatutakoen aurkezpena egingo da. Ondoren, herri bazkaria hasiko da, jai batzordeak ogia, postrea eta kafea jarriko dituela.

Arratsaldean, Laja eta konpainia trikitilarien ekitaldiaz gain, mus, igel eta bolo txapelketak egongo dira eta gauean berakatz-zopa eta txokolatea izango da bertaratutakoentzat.

‘Mozorro eguna’ ospatuko dute igandean eta 11.00etako meza nagusiaren ondoren Artzain-txakur, ardi eta abarren erakustaldia hasiko da eta jarraian saiheski pintxoen eta Gernikako piperren dastatzea egongo da. Arratsaldean mus eta briska txapelketak eta umeen jolasak egongo dira eta ondoren mozorro lehiaketaren sariak banatuko dira. Jaiak amaitzeko otzara zozkatu eta txokolate beroa egongo da bertaratutakoentzat.