Elorrioko Udalak San Pio eta Buzkantz kaleak birgaitzeko obrak egiteko banku-kreditua onartu du

Elorrioko Udalak San Pio eta Buzkantz kaleak birgaitzeko obrak egiteko banku-kreditua onartu du. Zehazki, 1.900.000 euro izango dira San Pio kalerako eta 300.000 euro Buzkantz kalerako. Maileguaren kontratuaren ezaugarri nagusiei dagokienez, adierazi behar da epe luzerako mailegua dela, eragiketa-motari dagokionez. Interesak likidatzeko eta amortizatzeko epea 12 urtekoa da, gabeziako 2 urte barne, eta interes-tasa aldakorra 3 hilabeterako euriborra + % 0,49 da.

Hirigintza zinegotzi Maria Herreroren arabera, “2008 urte inguruan ziren proiektua sortzen, baina tamaina eta kostu ekonomiko handiagatik legealdiz legealdi atzeratu egin da. San Pio Elorrioko sarrera nagusia da, hirigune historikoaren zati bat. Bere egoera fisikoa oso txarra da eta ez da batere atsegina: espaloien egoera ez da irisgarria oinezkoentzat, trafiko bolumen handia dago, eta, azken batean, segurtasuna ez dago bermatuta. Banku-kreditua izapidetuta, beste urrats bat eman dugu elorriarrekiko zor historikotzat jotzen duguna gauzatzeko “.

Udalerriko arteria nagusietako baten fisionomia goitik behera aldatuko da esku-hartze integral horren ondoren: noranzko bakarreko kale bihurtuko da, espaloiak zabalduko dira eta zoladurak eta hiri-altzariak egokituko dira, oinezkoek lehentasuna izan dezaten ibilgailuen zirkulazioaren aurrean.

Uholdeen saihestea

Herreroren arabera, “oraindik azken izapideak geratzen dira: obra lizitatzea, auzokideekin hitz egitea, trafikoaren zirkulaziorako bide alternatiboak prestatzea… Horrekin guztiarekin, espero dugu uda ostean hastea obrekin”.

Buzkantz kaleak irisgarritasun-arazoak ditu oinezkoentzat, eta uholde-arriskua ere bai, euri asko egiten duenean, etxabe urpean geratzen baitira. Esku-hartze honekin akats horiek konpondu nahi dira, hodien sistema berrituz eta kalea espaloi berriez, oinezkoentzako pasabide garaiez eta bidegorri batekin hornituz. Lanak udaberri amaieran hastea aurreikusten da.