Elorrioko Udalak abian duen prozesu partehartzailea Gazetan jarraituko du 10ean

Elorrioko Udaleko Gobernu taldeko ordezkariek Gazetan, Leizen eta Argiñetan bilduko dira datorren astetik aurrera auzoetako biztanleekin eta Iturri Kultur Etxan gainontzeko herritarrekin. Elorriarren ahotsa entzuteko asmoa duten hitzorduek, jarraipena emango diote dagoeneko hasita dagoen ‘Amestutako Elorrio egin’ prozesu partehartzaileari, elkarretaratzeen azken helburua Gobernu Plana egitea dela.

Kultur eta kirol eragileekin bildu ondoren eta Udaletxeko langileekin hitz egin eta gero,  Udaleko Gobernu taldeak “herriko bizilagunen iritziak eta kezkak jasoko ditu” eta horren ondoren “legegintzaldi honetarako ardatz izango duen Gobernu Plana” osatuko du, Idoia Buruaga Elorrioko alkatearen esanetan.

‘Amestutako Elorrio egin’ goiburupean hasitako prozesu partehartzailearen bitartez “Gobernu taldeak iritzi ezberdinak jaso nahi ditu biztanleek etorkizunerako dituzten proiektuen inguruan”.

Antolatutako batzarretara hurbiltzen den jendea talde txikiagoetan banatuko da “dinamika ahalik eta eraginkorrena izateko”. Ostean, berriz batu eta denen artean lehentasunak aipatuko dituzte.

Gobernu taldeak bileretan jasotako proposamenak aztertuko ditu eta abenduaren 2rako iragarrita dagoen “itzulketa saio” baten emango ditu ezagutzera “herritarrek jakin dezaten zeintzuk izan diren prozesuaren emaitzak eta zein proposamen lehenetsiko diren”.

Elorriar eta herriko alor guztiak kontuan izango dituen Gobernu Planak “Elorrio sendo eta egonkor bat” egiteko nahia du, Buruagaren esanetan. Datozen lau urteetarako egingo den planak “biharko Elorrioren oinarriak jarriko ditu” eta “guk denok amestutako Elorrio egiteko balio izango du”, azpimarratu zuen Buruagak.

Bost hitzordu:

-Azaroak 10: Gazeta auzoan, 18.30ean.
-Azaroak 12: Leiz auzoan, 18.30ean.
-Azaroak 17: herri-erdigunean, Iturri Kultur Etxean, 14.30ean eta 18.30ean.
-Azaroak 19: Argiñeta auzoan, 18.30ean.