EH Bilduk dioenez “uda honetan ez dugu igerilekurik izango Abadiñon”

Abadiñoko igerilekuak itxi zirenetik bi urte eta hiru hilabete igaro eta gero “estalkia berrizteko lanek esleitu gabe jarraitzen dute” eta, ondorioz, “uda honetan ez dugu igerilekurik izango eta beste aukera batzuk bilatu beharko ditugu”, EH Bilduk kritikatu duenez.

Udalak lanak esleitu bazituen ere, “aurreko lizitazioa irabazi zuen enpresak uko egin zion lanak egiteari” azaroan, “materialen prezioaren igoera zela eta”, alderdi soberanistaren esanetan.

Arazo hori ez da Gobernu Taldeari leporatzen dioten bakarra, akats nabarmenak egon direlako “instalazioen kontrola eta jarraipena” egiterakoak. “Instalazioak kudeatzen dituen Emtesport enpresarekin sinatutako akordioan zehazten da udalak mantentze-lanen eta egoera ekonomikoaren auditoretza bana enkargatu behar dituela urtero-urtero. Hala ere, epea pasa den arren 2021eko auditoretzarik gabe jarraitzen dugu”.

Ez da lehengo aldia horrelako zerbait gertatzen dena, Udala “hiru urtez jarraian ere egon izan da auditoretzarik egin gabe”. Horregatik diote ez dela harritzekoa “estalkia eta galdara-gela erabat hondatuta bukatu izana”, eta “kudeatzeko modu honek ondorio zuzenak ditu herritarrongan”. “Zerbitzurik gabe uzteaz gain, 3 milioi euroko gainkostua suposatu dute oraingoz”, eta diru horrekin “zenbat gauza egin genitzakeen?” galdetzen dute