Durangok kanpamentu artistiko berria antolatu du irailerako

Durangoko Udalak 2025eko udako udalekuetan izena emateko epea ireki du. Programa 3 eta 14 urte bitarteko haur eta nerabeei zuzenduta dago, eta aisialdi hezitzailerako alternatiba bat eskaintzea eta udako hilabeteetan familia eta lana uztartzea erraztea du helburu.

Jarduerak astelehenetik ostiralera egingo dira, 9: 00etatik 14:00etara, eta bi hamabostalditan antolatuko dira: ekainaren 23tik uztailaren 4ra eta uztailaren 7tik 18ra. Guztira, 528 plaza izango dira, honako programa hauetan banatuta:

• Txiki Txokoa (3-5 urte): euskarazko jarduerak tailer, jolas eta irteerekin.
• Hiri Kanpamendua (6-10 urte): ikaskuntza eta bizikidetza sustatzeko proposamen ludikoak.
• Abentura (11-14 urte): aire zabaleko jarduerak eta nerabeei egokitutako erronkak.
• Ingelesez Olgetan (7-14 urte): ingelesa modu dibertigarrian praktikatzeko aisialdi gunea.

Gainera, uztailaren 21etik abuztuaren 1era, Kirol Udalekua (7-14 urte) egingo da, jarduera fisikora eta kirolera bideratutako kanpamentu bat, 50 plazarekin.

Proposamen berria 

Berrikuntza gisa, aurten irailean eskainiko da lehen aldiz udaleku bat, 1etik 5era, ikuspegi artistiko batekin. 3 eta 10 urte bitarteko haurrei zuzenduta, programak 80 plaza izango ditu, eta sormena sustatzea izango du helburu, hainbat adierazpen artistikoren bidez.

Proposamen berri honen prezio publikoa udalbatzan onartu eta BAOn argitaratu beharko da, hau da, horrelako jardueretan erabili ohi den prozedura batean. Kostuari eta izena emateko epeari buruzko informazioa aurrerago jakinaraziko da, maiatzaren amaierarako edo ekainaren hasierarako aurreikusiz.

Jesica Ruiz Gazteria zinegotziak azpimarratu duenez, “Durangoko Udalak udalerriko haur eta gazteei ikaskuntza, bizikidetza eta sormena sustatzen dituzten aisialdi hezigarriko guneak eskaintzeko apustua egiten jarraitzen du. Aurten, udako udalekuen ohiko eskaintzari eusteaz gain, beste urrats bat egingo dugu irailean proposamen berri batekin. Proposamen hori haurrek ikasturtea hasi aurretik esperientzia artistiko batez gozatu ahal izateko diseinatuta dago. Gure ustez, ekimen honek familientzako aukerak zabaltzeaz gain, haurren garapena aberasten du sormenaren eta adierazpen artistikoaren bidez. Familia guztiak parte hartzera eta aukera berri hau aprobetxatzera animatzen ditugu “.

Izena emateko epea

Izena emateko epea martxoaren 24tik 31ra egongo da zabalik, eta Intxaurrondo Gaztegunean eta Kulturgunean egin ahal izango da, baita online ere, www.durango.eus/udaro udal webgunearen bidez. Plazak zozketa bidez esleituko dira.

Informazio xehatua, araudia eta izena emateko inprimakia hemen daude eskuragarri: www.durango.eus/udaro. Edozein kontsulta egiteko, interesdunek Intxaurrondo Gaztegunera jo dezakete, intxaurrondo@durango.eus helbidera idatzi edo 94 603 00 30 telefonora deitu.