Aurtengo ‘Hitzez eta Ahotsez’ zikloa Xabier Amurizaren ekitaldiarekin hasiko da

Xabier Amuriza bertsolari eta idazle berriztarra gonbidatu dute aurtengo ‘Durangaldea, Hitzez eta Ahotsez’ ekimenari hasiera emateko, hirugarren edizio honetako protagonistak Durangaldeko idazleak izango baitira. Literatura eta idazmena lantzen dituen egitasmo honek aurreko urteetan antolatutako Tertulia dialogikoak eta apirilean Plateruenan egingo den Irakurraldia ere iragartzen ditu datozen hilabeteetarako.

‘Hitzez eta Ahotsez’ ekimena datorren ostegunean, hilak 21, arratsaldeko 19.00etan Durangoko Arte eta Historia Museoan abiatuko da. ‘Mundua-Euskal Herria. Gu-Ni’ izenburua duen saioak Xabier Amuriza izango du protagonista eta berak eskainiko duen bakarrizketaz gain berari egingo zaion elkarrizketarekin osatuko da ekitaldia.

Hirugarren edizioa antolatzerakoan “aurreko urteetan izandako partaidetza” kontuan izan duten antolatzaileek eta horregatik ekimenaren hastapeneko helburuei eutsi diotela azpimarratzen dute. Durangaldeko idazleak, klasikoak zein gaur egunekoak, protagonista izango dituen ekimenak jarraipena izango du hurrengo hilabeteetan eta otsailean eta martxoan Tertulia dialogikoak izango dira Durangoko Udal Bibliotekan.

Apirilaren 22an berriz, Irakurraldia egingo dute Plateruena Kafe Antzokian eta bertan Durangaldeko sortzaileak izango dira protagonista. Hitzez eta Ahotsez talde antolatzailearen esanetan “Durangaldeko aspaldiko sortzaile zein sortzaile-gaiei aukera ematen diegu beraien buruari buelta batzuk eman eta jendaurrean euren sorkuntzak azaltzeko”.

Irakurraldiko partaide bakoitzak pare bat minutu izango ditu berak idatzitako testua irakurtzeko eta horretarako beharrezkoa da aldez aurretik izena ematea hitzezetaahotsez@gmail.com helbide elektronikoan edo 699872395 telefonoan.

Sarri eta Itsasoa

Hitzez eta Ahotsez ekimena 2014an hasi zen ‘Sarri, Hitzez eta Ahotsez’ egitasmoarekin,  ekitaldietan Joseba Sarrionandiak sortutako hainbat testu irakurri, errezitatu eta abestu zirela. Antolatutako ekitaldietara 200 lagun gerturatu ziren guztira.

Lehenengo edizioan izandako arrakasta ikusirik, iaz bigarren edizioa antolatzera animatu ziren eta aukeratutako gaia ‘Itsasoa’ izan zen. Saioetan gaur egungo zen aspaldiko hainbat idazleren ipuin, narrazio eta poemak izan zuten lekua, besteak beste, Joseba Sarrionandia, Leire Bilbao, Miren Agur Meabe, Kirmen Uribe, Txomin Agirre, Pako Aristi, Toti Martínez de Lezea edo Aurelia Arkotxarenak.