Atxondoko Udalak 4.000 metro karratuko lur-arloa bilatu nahi du Apatan herri-ortuak egiteko

Atxondoko Udalak 3.000 edo 4.000 metro karratuko lur-arloa bilatu nahi du Apatamonasterioko elizatean herri-ortuak egiteko. Egitasmo honekin 2011ean hasitako ekimen bat gauzatu eta 40 edo 50 metro koadroko partzelak herritarren erabilpenerako egokitu nahi dituzte.

Atxondoko Udaleko arduradunek orain direla lau urte kaleratu zuten bandoa herri-ortuak erabiltzeko eta egindako deiari “30 herritarrek baino gehiago erantzun eta izena eman zuten ortuak erabiltzeko” David Cobos alkatearen esanetan.

Egindako lehen ahalegina garatu ezinekoa izan zen, baina “herrian era honetako ekimen bat aurrera ateratzeko dagoen interes handia” kontuan hartuta, asmoari berriro heltzea erabaki dute. 

Herri-ortuak egiteko egitasmoak izandako oztopoa lur-arloa lortzearena zela aitortu zuen Cobosek eta dagoeneko hainbat jabeekin ari dira negoziatzen. “Datozenen eskaintzak entzun eta aukera ezberdinak aztertuko ditugu”, argitu du alkateak.

Udalak aurreikusten duen aukera nagusia “printzipioz, arloren bat errentan hartzea” dela aitortu du Cobosek baina “prezio egokian saltzeko prest dagoen jaberik aurkituz gero, udalak ez du baztertzen lurrak erosteko aukera ere”.

Udalak negu honetan sinatu nahi du kontratua jabeekin, “udaberrirako erabiltzaileen artean banaketa egin ahal izateko” eta behar diren egokitzapen lanak egiteko.

Herri-ortuen asmoa gauzatzeko Iurretako esperientziaz baliatu nahi da Atxondoko Udala. Dagoeneko bost urteko ibilbidea bete dute Iturburuko partzelak eta urtea amaitu orduko egingo da bigarren bosturtekoan erabiltzeko esleipena.