Atxondoko Gaztetxeak 450 kilo elikagai eta 100 jostailu batu ditu bilketa solidarioan

Atxondoko Gaztetxean abenduaren 22an, 23an eta 26an egindako janari eta jostailu bilketa solidarioan 450 kilo elikagai eta 100 jostailu batu zituzten. Jasotako guztiak Durangoko JAED elkarteari eman dizkiote.

2014ko azken egunetan burututako bilketa solidarioa, Atxondoko Gaztetxeak egindako bigarrena da eta 2013an batutakoa gainditzea lortu dute. Antolatzaileek janari ez-galkorrak eskatu zituzten eta herritarrek ondo baino hobe erantzun diete eskakizunari arroza, pasta, egoskari, gailetak eta olioa emanez. Norbaitek kabiar lata pare bat ere entregatu ditu.

Jostailuei dagokienez 100 piezatik gora jaso dira, batik bat, panpinak, mota desberdineko figurak eta mahai jokoak.

Jasotako guztia Durangoko JAEDen egoitzara eraman dute dagoeneko, elkarte horretako kideek behar dutenen artean banatu dezaten.

2013an soilik elikagaien bilketa egin zen eta jasotako 400 kilo jaki Bizkaiko Janari Bankura eraman zituzten. Aurten berriz, elikagaiak eta jostailuak batu direnez Durangoko JAED elkarteari ematea erabaki dute.

Egoera ekonomikoa aldatu ezean eta janari beharra duen jendea egon bitartean, Atxondoko Gaztetxeko kideek horrelako kanpainak egiten jarraituko dute.