Atxondok Zengotitabengoa presoaren espetxe baldintzak hobetzea eskatuko du

Atxondoko udalbatzak aho batez onartu zuen atzo, Andoni Zengotitabengoa preso elorriarraren espetxe baldintzak hobetzea eskatzen duen idatzia. Zengotitabengoak ia bost urte daramatza Lisboako Monsanto segurtasun goreneko espetxean eta bertan jasatako egoerak “sufrimendua besterik ez dakar” eta egoera hori “mendek goseak bakarrik justifikatu dezake”.

Onartutako mozioaren arabera Monsantoko kartzelan dagoen presoak “urtean  behin du alabekin bisa eta bikotearekin, berriz, hilean behin. Hiru urte dira bere amak besarkatzen ez duela”.

Bisitatzeko baldintzez gain, presoak bere eguneroko bizitza gogorra aipatzen da idatzian, egunean 22 ordu bakarrik dagoelako edo sistematikoki katxeatzen dutelako. “Ez dago espetxe osoan beste presorik egoera horretan hainbete denbora daramanik”.

Nahiz eta Zengotitabengoa ez izan Atxondoko herritarra bere bikotea eta bere alabak Atxondokoak dira. Horregatik, Udalak bere eskura dagoen guztia egingo du espetxeko zuzendariaren aurrean eta Portugaleko ‘Provedor de Justiça” delakoaren aurrean, besteak beste, “ahal bait arinen espetxe arrunt batera eraman dezaten”.

Atxondoko Bilduk eta EAJk aho batez onartutako idatziak “senitarteko eta lagunen bisitak jasotzeko eta alabekin egoteko, beste edozein presok dituen baldintza berberetan” ere eskatzen da. Gainera atxikimendua eskatuko die Eusko Jaurlaritzari, Eusko Legebiltzarrari, Batzar Nagusiei eta Foru Aldundiari.