Arrazolako etxebizitza publikoak lortzeko baldintzak malgutu ditu Atxondoko Udalak

Atxondoko Udaleko osoko bilkurak Arrazolan dituen lau etxebizitza sozialak alokairuan emateko prozeduraren araudia eta bete beharreko baldintzak malgutzea erabaki du. Aldaketa egiteak EH Bilduren aldeko botoekin egin zuen aurrera, EAJko zinegotziek abstenitu egin baitziren.

Aldaketa honekin hutsik gelditzen ziren etxebizitzak alokairuan emateko erraztasuna izango du Udalak, orain arte “hautagaien eskakizun guztiak logela bakarreko multzorako zirelako”, David Cobos Atxondoko alkateak adierazi zuenez. Iazko urte amaieran bi etxebizitza libratu ziren, bata logela bakarreko eta beste bi logela dituena eta eskari guztiak logela batekoarentzat ziren.

Udalak orain arte izan duen araudiaren arabera, ezinezkoa zen izena multzo batean emanda zuenak beste multzo bateko etxebizitza lortzea. Hau da, logela bakarreko etxebizitzarako eskaria egiten zuenak ezin zuen bi logelako etxebizitza eskuratu; edo bi logelaren multzoan izena emandakoak ezin zuen hiru logelako etxebizitza lortu.

Salbuespena

Arrazolako eraikinean etxebizitza hutsik ez egoteko asmoarekin artikulu bat gehitu diote araudiari, salbuespen gisa. Bertan azaltzen da “etxeetako bat hutsik baldin badago eta ez badago maila horretarako hautagairik zerrendan, aukera izango dute etxe horretara joateko beste maila batzuetan izena eman zutenek, lehentasuna izanik maila gorenekoek”.

Hala ere, araudiak argi uzten du “ordaindu beharreko errentaren zenbatekoa azkenean esleitutako etxebizitzaren araberakoa” izango dela eta “ez hasieran izena emandako mailakoarena”.

Atxondoko Udalak lau etxebizitza publiko ditu Arrazolako udaletxe zaharreko eraikinean. Hauetariko bi 45 metro karratu inguru dituzte eta logela batekoak dira; beste batek 70 metro karratu ditu eta bi logelatakoa da eta laugarrenak 90 metro karratu eta hiru logela ditu. Guztien esleipena alokairu bidez egiten da.

EAJk ez zion eman aldeko botoa araudiaren aldaketari, taldeak ez zuelako proposamen horren berri izan osoko bilkurarako deia egin aurretik, Gorka Garate jeltzaleen bozeramaileak salatu zuenez. David Cobos alkateak berriz, bera eta bere taldea jeltzaleekin edonoiz eta edonon batzartzeko prest daudela berretsi zion.