Abadiñoko EH Bildu ziklo berria prestatzen hasiko da gazteria arloa aztertuz

Abadiñoko EHBilduk ‘(h)ari gara’ herri ekimen parte hartzailea jarri du abian, berorren asmoa “herri proiektua berrikusi“ eta “herrien beharretara” egokitzea dela. Ekimen horren asmoa sektore desberdinak lantzea da eta lehen saioa gaur, ostirala 16, arratsaldeko 17.30etan izango da Matienako Erroko Kultur Etxean, gazteria arloa aztertuz.

‘(h)ari gara’ ekimenarekin “ziklo berrirako prestatzen” hasia da Abadiñoko EHBildu. Alde batetik, herritarrei ekarpenak egiteko tartea irekitzen die, herrian dauden errealitate ezberdinen berri izateko eta, bestetik, herriko diagnostikoa osatzeko asmoarekin, hainbat bilera burutuko dituzte gai eta sektore ezberdinak ardatz hartuta.

Bihartik aurrera izango diren bilerez gain, parte hartu nahi duten herritarrek bestelako aukerak ere izango dituzte euren ekarpenak egiteko. Alde batetik, otsailaren 4tik aurrera San Prudentzio 2an kokatuko den egoitza berrian, asteazkenero 18.00etatik 19.30etara edo, bestela, ehbilduabadino@gmail.com helbide elektronikora idatziz.

Hurrengo bileretara joateko asmoa dutenek, eta berauek hobeto antolatzeko, asistentzia konfirmatu eta topaketaren informazioa jasotzeko, antolatzaileek aurreko helbide elektronikora idaztea eskertzen dute.