Birjintasun bekak

Herrialde ezberdinetan gazteentzat eskaintzen diren beken inguruko informazio bila nenbilela, inoiz imajinatuko ez nukeen beka batekin egin dut topo, BIRJINTASUN BEKArekin hain zuzen.

Birjintasun bekok Afrika mendebaldeko Sierra Leonan eskaintzen dira XXI. mende honetan. Antza denez, nerabeen arteko haurdunaldi kopurua handia da inguru hartan eta ondorioz neskatoen %80 irakaskuntzatik kanpo geratzen dira. Haurdunaldiok ekiditeko  Bo hiriko agintariek, herrialdeko bigarren hiririk handienekoek, 5 urteko bekak eskaintzen dizkie graduaziora arte birjin mantentzen diren neskatoei.

Beka horiekin, Bo hiriko herri agintariek uste dute eskola sasoian dauden neskatoen kopuru handi batek eskola amaitu arte birjintasuna mantendu egingo duela. Gainera bekok, gura izanez gero, erabilgarri egongo dira ikasleek unibertsitatea amaitu arte.

Herri kontseiluak adierazi du emakumezko medikuek konprobatuko dutela eskola-neskatoen birjintasuna. Antza denez, zenbait familia ???birjintasun bekak??? izeneko ekimen honekin ez datoz guztiz bat, eta beste bideren batzuk aztertu beharko liratekeelakoan daude.

Dirudienez ez da Sierra Leonan nerabeen arteko haurdunaldiak ekiditeko ekimenak proposatu diren lehen aldia baina orain artekoak ez dira oso eraginkorrak izan, antza.

Birjintasun beken erabaki berri eta bitxi honetan, nire ustez, erlijioak ere izango du bere pisua eta ez da emakumeen askatasunaren aldekoan izango seguru asko. Izan ere, normalean, erlijioak  asko arduratzen dira emakumeen birjintasunaz, ez horrenbeste gizonezkoenaz ostera. Sierra Leonan %10 katolikoak dira, %60 islamistak eta gainontzekoak animistak.

Kontuak kontu, birjintasun bekak jarri beharrean, antisorgailuak eskuratzeko ahalmena gehitu eta heziketa sexuala hobetuko balute, agian bete kuku batek joko luke Afrikako mendebal hartan, haurdunaldi gutxiago suertatuko lirateke eta emakumeak libreagoak izango lirateke.

Marisa Barrena psikopedagogoa da