Joseba Sarrionandiak irekiko du arratsaldean Hitzez eta Ahotsezen
10. edizioko irakurraldi girotua

Gaur arratsaldean egingo dute Plateruenan Hitzez eta Ahotsez ekimenaren 10. edizioko irakurraldi girotua. 16:00etatik 22:00etara luzatuko den saioak literatura, ahozkotasuna eta diziplina artistiko ezberdinak uztartuko ditu beste behin ere, eta aurtengoan, gainera, lehen edizioari keinua egingo dio Joseba Sarrionandiaren parte-hartzearekin.

Ohi bezala, txalaparta hotsez emango diote hasiera ekitaldiari, eta ondoren, Sarrionandiak berak hartuko du hitza. Ez da kasualitatea izango: 2014ko lehen edizioa ‘Sarri Hitzez eta Ahotsez’ izenpean egin zuten, idazlea erbestean zegoela oraindik, eta nolabait haren omenez sortu zen egitasmoa. Hamargarren edizio honetan, ordea, bere sorkuntza zuzenean entzuteko aukera izango dute bertaratutakoek.

Sarrionandiaren ostean, 120tik gora irakurle igaroko dira mikrofono aurretik. Antolatzaileek azaldu dutenez, aurten inoiz baino testu gehiago entzungo dira, bai sortutakoak, bai aukeratutakoak. Iaz bezala, hitanoak ere izango du bere tokia irakurraldian.

Parte-hartzaileen aniztasuna izango da berriro ekimenaren ezaugarrietako bat. Gazteena 13 urteko neska bat izango da, aitarekin batera irakurriko duena; zaharrena, berriz, 89 urteko emakume bat, alabaren biola doinuek lagunduta egingo duena irakurketa.

Irakurleez gain, beste 40 bat lagunek ere girotuko dute saioa. Dantzariak, bertsolariak, abeslariak eta antzezleak igoko dira oholtzara arratsaldean. Besteak beste, Kriskitin, Ina Eskola eta Hotzikara taldeetako dantzariak izango dira bertan; baita Murua eta Abarkas bertsolariak ere. Musikaren alorrean, Bengoa, Larrañaga, Unzueta, Ugarriza, Gandiaga, Zumarraga eta Kanta Lagunak arituko dira, eta Karrika taldeko antzezleek ere parte hartuko dute.

Erbestea eta migrazioa

Aurtengo irakurraldiak aurreko edizioetan landutako gaiak berriz ekarriko ditu Plateruenara: Sarriren unibertsoa, itsasoa, Durangaldeko idazleak, bidaia, lurra, askatasuna, maitasuna, ametsak eta umorea, besteak beste. Antolatzaileek azaldu dutenez, errepasoa egiteaz gain, gaur egungo egoerarekin lotutako gaiak ere landuko dira, hala nola, memoria historikoa, erbestea edo migrazioa. Ekitaldiari amaiera emateko, aurreko edizio gehienetan bezala, Luhartz talde profesionala arduratuko da azken emanaldiaz.

Antolatzaileek azpimarratu dute ekitaldia doakoa izango dela, eta Plateruenako ateak zabalik egongo direla literaturzale eta kulturzale guztientzat. Haien esanetan, irakurle eta artistek “herriari debalde hartutakoa debalde eskainiko diote berriz ere herriari”.

Bi urteko etenaren ondoren, Hitzez eta Ahotsez indarberrituta itzuli da aurten, eta 10. edizioak lehen urteetako espirituari berriro heldu nahi dio: literatura partekatzea, ahotsa plazara ateratzea eta komunitatea hitzen inguruan biltzea.