200 lagunetik gora biltzea espero dute Berbalagun mintzapraktika programan

Durangoko Merinaldeko Amankomunazgoak, Udal Administrazioak, AEK, Durangoko Udal Euskaltegia, Hizkuntza Eskola, Barriketan, Berbaro eta Eixu erakunde eta elkarteekin batera, Berbalagun Mintzapraktika programa antolatuko du aurten ere. Ikasturte berrian, antolatzaileek 200 lagunetik gora parte hartzea espero dute biltzea, gutxi gora behera, iaz izandako kopuru bera.

Berbalagun programaren helburu nagusia “euskara sendatzea eta sendotzea da; hau da, euskarak kalean duen presentzia areagotu, erabilera esparruak zabaldu eta euskaldun berriak eta euskaldun zaharrak harremanetan jartzea”. Asmo horretan oinarrituta “euskera praktikatzeko eta euskaraz bizi ahal izateko aukera” eskaintzen zaie partaideei, “hainbat egoera eta jarduera sortuz eta antolatuz”.

“Euskara-maila hobetu eta ikas-prozesua bizkortu”, “euskarazko harreman-sareak sortu eta erabilera-gune berriak” irabazi eta “hizkuntzarekiko atxikimendua eta motibazioa” areagotzea dira, besteak beste, eragileen asmo nagusiak. Egitasmoaren sustatzaileak berriz “euskararen normalizazio-prozesuko eragile aktibo” bihurtzen dira.

Berbalagun egitasmoak ekintza osagarriak antolatzen ditu eta urtero egin ohi diren kultur lehiaketa edo sagardotegira irteeraz gain, aurten kakorratz eta puntu taldeak, sukaldaritza saioak edo eskualdea ezagutzeko irteerak aurreikusten dira. Horietan guztietan, dohainik parte hartzeko aukera izango du herritar orok.

Hainbat abantaila

Berbalagun guztiek bidaia eta egonaldietarako deskontuak, AIZU! eta Argia aldizkariak eta Berria egunkaria merkeago, eta beste hainbat abantaila eskuratu ahalko dituzte.

Interesdunek Durangaldeko AEK euskaltegietan, Durangoko Udal Euskaltegian, Hizkuntza Eskolan, udaletako euskara zerbitzuetan edo kultur etxeetan izena eman dezakete; baita telefonoz (639 400 786) edo e-mailez (durangaldea@aek.org ) ere. Informazio gehiagorako blog-a (www.durangaldea.blogspot.com) eta facebook-a ere badaude.

Ikasturteari hasiera emateko Mintzodromoa antolatu da Durangoko Plateruena Kafe Antzokian urriaren 29rako, goizeko 10.00etan eta arratsaldeko 18.00etan izango diren saioetan. Kafetxo baten inguruan, hiru gai ordubetean euskaraz berba egiteko, jendea ezagutzeko eta euskaraz gozatzeko aukera izango da. Izena emateko epea urriaren 22an amaitzen da.