120.000 euro bideratuko ditu Atxondoko udalak Apatako pilotalekua konpontzeko

Atxondoko udalak 120.000 euro inguru bideratuko ditu Apatako pilotalekuan berritze-lanak egiteko. Urtarrilean hasiko dituzten lanak aurreikusitakoak baino handiagoak izango dira eta horregatik kirol instalazioa itxita egongo da lau hilabetez.

Atxondoko udaleko aurreko legegintzaldian onartu zen Apatako frontoian berritze-lanak egitea eta horretarako 50.000 uro bideratu ziren. Baina lanak egin behar zirela eta agintari berriek aurreikusitakoa baino gehiago egitea erabaki dute eta horretarako 2015eko aurrekontuaren aldaketa onartu zuten udaletxean egindako azken osoko bilkuran.  

Hasierako lanak harmailaren atzealdea erabat zerratzea aurreikusten zuten, “haizea eta zikinkeria sartzen delako bertatik” David Cobos alkateak aipatu zuenez. Egoera hori konpontzeko eta eguraldiak frontoi barruko jardueratan izan dezakeen eragina saihesteko asmoarekin, metakrilatozko xaflekik egindako itxitura jartzea erabaki zuten. Ondorioz, pilotalekua guztiz itxita egongo da.

Hobetze lan horretaz gain “beste premia batzuk ere bazeudela” ikusi zuten agintariek eta onartutako aurrekontuaren aldaketak bestelako lanak ere gauzatzea ahalbidetuko du.

Argitasun gehiago

Frontoia margotu behar zela ere aurreikusita zegoen eta horretaz gain “konpondu behar ziren hainbat itogin zegoela ikusi genuen”, Cobosen esanetan. Teilatuko zuloak konpontzearekin batera, frontoiko iluntasuna gutxitzeko aukera zegoela ohartu ziren eta argitasuna gehitzeko asmoarekin argia pasatzen uzten duten xaflak jarriko dituzte.

Kirol-instalazio horretan egingo diren lanak kanpoaldean egingo den biltegi batekin osotuko dira.

Hobetze lanak urtarrilean hasiko dira eta lau hilabete inguru luzatuko direnez, pilotalekua “datorren apirilararte egongo da itxita”, Cobosen esanetan