Zornotzan hasi eta Elorrion amaituko da hiru eguneko Gazte Martxa

Ezker Abertzalearen baitan kokatzen diren Ikasle Abertzaleak ikasleen antolakundeak eta Ernai gazteen mugimenduak Zornotza eta Elorrio lotuko dituen martxa antolatu dute uztaileko azken hiru egunetarako. ‘Burujabetzaren bila’ goiburupean burutuko den ibilbideaz gain hainbat ekimen prestatu dituzte.

Uztailaren 29 Zornotzako Zelaietatik abiatu eta uztailaren 31n Elorrion amaituko den Gazte Martxak “burujabetzaren aldeko gazteak, hau da, indibidualki zein kolektiboki gure etorkizuna erabakitzearen aldeko gazteak” batzeko asmoa du, antolatzaileen esanetan.

Ekimen horren bitartez eskualdeko herri ezberdinetan eta arlo ezberdinetan martxan dauden gazteen harremanak sendotzeaz gain, hiru egun hauetan “Euskal Herria arloz arlo eraikitzera goazela” aldarrikatuko dute.

Lehengo eguneko ibilbidea goizeko 10.00etan abiatuko da eta Mañariraino helduko da. Bazkaria Durangoko Andra Marin egingo dute eta ostean tribialari ekingo diote. 18.00etan Mañariko bidea hartuko dute eta bertara heltzerakoan ‘Borroka belaunaldiak’ gairen inguruko hitzaldia izango da frontoian. Afalostean ‘Tximeletak’ bideo emango da.

Fracking ez! hitzaldia Pol-polen

30eko egitaraua 9.00etan abiatuko da partaideen irteerarekin. Bazkaria Pol-polen egingo dute eta ostean ‘Fracking ez!’ izenburua duen hitzaldia egongo da. Martxako partaideek Axpera daraman bideari ekingo diote jarraian eta 21.30ean afaria egingo dute Atxondoko elizate horretako frontoian. Eguna borobiltzeko musika kontzertua egongo da.

Azken eguneko ibilaldia goizeko 10.00etan abiatuko da eta 13.00ak aldera helduko da Elorrioko plazara, amaiera ekitaldia, azken bazkaria eta poteoa bertan egiteko.  

2015eko Gazte Martxan parte hartzeko 10 euro balio duen tiketa eskuratu behar da Durangoko Intxaurren, Elorrixoko Portalekuan, Zaldibarko Castet elkartean, Abadiñoko Abarkateruenan edo Zornotzako Belatxikietan.