Zornotzako Gure esku dago ekimenak 2015erako dinamikak aurkeztu ditu

Zornotzako Gure esku dago ekimenak 2015erako dituen helburuak aurkeztu zituen Zelaieta Zentroan burututako ekitaldian. Iragarritako asmoen artean “borondatea jostea” aipatzen dute erakundeko kideek eta, horretarako, oihal zati pertsonalizatuekin hautetsontzi erraldoi bat egingo dute.

Ekitaldia EITBko Eider Bilbao esataria eta Udal Euskaltegiko zuzendari den Rafa Ugaldek aurkeztu zuten eta bertaratutakoek txalapartaren doinuekin izan zuten ongi etorria. Ondoren, ekainaren 8an egindako Giza Kate erraldoian ateratako bideoa eta argazkiak erakutsi ziren, ekimen horretan 1500 zornotzar izan zirela Abadiñon kokatuta zegoen 4. kilometroan.

Bideo baten bitartez urte osorako iragarritako ekimenen berri eman zen eta “eginbeharrekoak hobeto ulertzeko, ariketa praktiko bat egin genuen agertokian”. Azalpenak hainbat herritar ezagunen laguntzarekin eman ziren, oholtza gainean Seiren taldeko Onintze eta Jokin, Javi Renobales aktorea, Miren Larrea txotxongilo aktorea edo Unai Ormaetxea bertsolaria izan ziren, besteak beste.

Ekitaldiari amaiera emateko, aukera izan zuten bertaratutakoek oihal zatiak hartu eta pertsonalizatzeko. Aurtengo helburua “ezberdinen arteko borondatea jostea da” eta horretarako “ohial zatiak pertsonalizatu, josi eta hautestontzi erraldoi bat egingo dugu, ekainaren 20an herrialde bakoitzak bere hiriburuan erakutsiko duena”.