Zornotzako auzotaxi zerbitzua egokitu du Udalak “zentzuzko erabilera” indartzeko

Amorebieta-Etxanoko Udalak ‘auzotaxi’ zerbitzua arautzen duen ordenantza aldatzea eta beharrizanei egokitzea erabaki du, herritarrek “zentzuzko erabilera” egin dezaten. Udalbatza osoak aho batez onartutako aldaketa indarrean sartzen denean, bidaiariek udaletxean erosiko dituzten bonoen bitartez egingo dute zerbitzuaren ordainketa.

Auzotaxi zerbitzua 2012an jarri zuen udalak herriko auzoen arteko distantziak orekatzeko eta “erdigunetik urrun dauden auzoak herriaren erdigunearekin lotzeko”. Horretara 12 euroko prezio bakarra jartzea erabaki zen, egindako joan-etorriaren distantzia kontuan hartu barik.

Orain, “zerbitzua bermatzea” nahi duen araudiaren egokitzapena egin du Udalak, “%10ak erabilera kaskarra egiten zuelako eta, kasu batzuetan, taxia zortzi aldiz hartzen zutelako egunean”, Andoni Agirrebeitia alkateak aitortu zuenez. Gainera, erabiltzaile gehienek, bataz beste, “50 eta 60 joan-etorri artean egiten dituzte urte osoan”.

Auzotaxi zerbitzuaren prezioa 12 eurokoa izaten jarraituko du eta orain arte izan den bezala bidaiariak 2 euro ordainduko ditu joan-etorriko; gainerako 10 euroak Udalak ordainduko ditu taxi gidariari eman beharko zaion bonoen bitartez. Baina hori lehenengo 50 bidaietan izango da.

50 bidaiatik gora, diru-laguntza gutxiago

Udalak egindako aldaketa 51. bidaiatik aurrera gauzatuko da, “gehiegikeriak saihesteko asmoarekin” Agirrebeitiaren esanetan. 51. eta 100. arteko joan-etorri bakoitzagatik, bidaiariak 6 euro ordaindu beharko ditu eta Udalak gainerako 6 euroak jarriko ditu. Azkenik, 101 eta 150 bidaia artean, diru-laguntza 4 eurokoa izango da eta herritarrek 8 euro ordaindu beharko dituzte joan-etorriko.

Bonoak hamarnaka salduko dira udaletxeko bulegoetan eta joan-etorri bakoitzean bat eman beharko zaio taxi gidariari. Honek, udaletxean aurkeztu beharko ditu egiaztagiriak diferentzia kobratzeko.

Araudi berria indarrean jarri aurretik “ordenantzaren aldaketa publikatu behar dugu” eta jarraian “kanpaina zabala egingo dugu auzoetako erabiltzaileei zein taxi gidariei aldaketen berri emateko”, adierazi zuen Agirrebeitiak.

Auzotaxi zerbitzuak 140 erabiltzaile ditu urtero, auzoetan bizi diren herritarrak anbulatoriora, ikastetxeetara, bankuetara edo dendetara, besteak beste, gerturatzeko. Taxi zerbitzua astelehenetik ostiralera 07.30etik 19.00etara eskaintzen da. Denbora tarte honetan, zerbitzua erabili nahi duten auzoetako herritarrak euren etxean jasotzen dituzte eta gero, hauek horrela nahi badute, etxera eramaten dituzte berriro.