Xabat Olariaga, Ainara Arco eta Ander Gutierrez saritu dituzte kirolean euskarari eusteagatik

Xabat Olariaga eta Ainara Arco saskibaloian, eta Ander Gutierrez, kirol anitzeko entrenatzaileak saritu ditu Berrizko Udalak, eskola kirol ezberdinetan euskararen sokari eusten egiten ari diren lana eskertzeko. Sariak, Eskolako jai egunean banandu ziren.

Berrizko Udaleko Euskara Sailak, Eskolako Guraso Elkartearekin elkarlanean, eskola kirol ezberdinen entrenamenduak behatu ditu, euskara erabilera zenbatekoa den jakiteko. “Zoritxarrez oraindik ume askok aisialdia gaztelaniarekin lotzen dute. Hauen kasuan entrenatzailea euskaraz aritzea berebizikoa da”, azpimarratu dute.

Neurketak egin dira saskibaloi, futbito, kirol anitza, gimnasia erritmikoa eta atletismoko entrenamenduetan. Ondorioa, Berrizko eskola-kiroleko ikastaroetan gehien erabiltzen den hizkuntza gaztelania da. Gainera, entrenatzaileen borondatearen arabera erabiltzen da hizkuntza bat edo bestea eta entrenatzaile batzuk gaztelaniarako joera daukate, bi salbuespen kenduta, saskibaloia eta kirolanitza, entrenatzaile hauek azalpenak euskaraz emateaz gain, umeek gaztelaniaz egiten dietenean eutsi ere egiten diote.

Gainontzekoak “kutsatu”

Umeek batez ere gaztelaniaz aritzen dira, bai euren kideekin zein entrenatzaileekin, ume gehienak euskaldunak diren arren, batzuk hobeto moldatzen dira gaztelaniaz eta gainontzekoak “kutsatu” egiten dituzte. Entrenatzaileek umeengan daukaten jarrerak  ere eragin handia dauka umeen hizkuntzaren erabileran, euskararik eusten dioten entrenatzaileei euskaraz zuzentzen zaizkie umeek.

“Entrenatzaileen paperak bereziko garrantzia dauka: entrenatzaileak haurrentzako erreferentzia garrantzitsua dira, paper aktiboa jokatzen dute umeen hezkuntzan eta hori gainera giro dibertigarri eta atsegin batean egiten dute”, azaldu dute ekimenaren arduradunek.