53. Durangoko Azokako ateak domekara arte egongo dira irekita.

Bide erdia baino gehiago egin duen 53. Durangoko Azokak, programazio zabala eta oparoa iragartzen du edizio hau agurtu eta ateak itxi aurretik. Lehen hiru egunetan jendetza ibili da Landakon zein erakustazokatik kanpo jarritako guneetan eta, itxura baten, bisitarien kopuruak ez du behera egingo azken bi egunetan.

Izan ere, gizakiok ohiturako animaliak gara eta eginbeharrak, sarritan, azken ordurako uzten ditugu; baita Azokarako bisita ere. Beste kasu batzuetan Landakora egindako bisita bat ez da nahikoa izaten, beste erosketaren bat egin behar delako, eguneko egitarauan dagoen zerbait erakarria delako edo, bestelako barik, lagunekin hitzordua egin delako. Gainera, egunotan, Azokako zein Durango osoko giroa primerakoa da.

Gutxi balitz, Azokako gune desberdinetarako prestatutako egitarauak proposamen indartsuak iragartzen ditu azken txanparako. Gaur goizean, Gatibu, Txapelpunk, Bad Sound, Hara!, McOnak edo Lehiotikan taldeek euren azken lanak aurkeztuko dituzte Ahotsenearen zuzenekoen gunean. Solasaldien aretoan berriz, Uxue Alberdik eta Eider Eibarrek zein Unai Iturriagak eta Alex San Vicentek egindako azken liburuak aurkeztuko dituzte.

Soinujolearen semea Irudienean

Bernardo Atxagaren liburuaren oinarritutako ‘Soinujolearen semea’  pelikularen emanaldi berezia egongo da Irudienean eta areto berean aurkeztuko da ‘Agur Etxebeste! filmaren proiektua.

Szenatokian berriz, ‘Tomiris’, ‘Agur eta Dolore’ eta ‘Schrodinger-en katua’ pieza laburrak eszenaratuko dira; Areto Nagusian Carlos Garaikoetxea edo Telesforo Monzon politikariak zein ‘Kulturaren transmisioa eskolan’ izango dira hizpide eta eguna amaitzeko 25. urteurrena ospatzen ari den Anestesia taldearen kontzertua egongo da Plateruenan.

Hainbat proposamen izango dira bihar ere, 53. Durangoko Azoka Olatz Salvadorrek Plateruenan eskainiko duen kontzertuarekin amaitu aurretik. Areto Nagusian ‘Cárceles y derechos. Alejamiento, enfermedad, acumulación de condenas” izango dute hizpide Joseba Azkarragak, Iñaki Lasagabasterrek eta Jon Iñarrituk eta Szenatokian ‘Inondik inora’ familientzako antzezlana eszenaratuko da.

Ahotseneako egitaraua ekitaldiz beteta egongo da eta zuzeneko aretoan Inun, Ibai Martin, Guda dantza edo Elortegi anaien lan berrien aurkezpena egongo bada, solasaldien aretoan Edorta Jimenezek edo Jon Arretxek euren azken lanak aurkeztuko dituzte.

La entrada Durangoko Azokak proposamen ugari iragartzen ditu edizio honetako azken bi egunetarako se publicó primero en durangon.com.

landako Gunean egin zen 53. Durangoko Azokaren aurkezpena.

‘DA! asko dira’ lelopean abenduren 5etik 9ra arte egingo den 53. Durango Azokak, 200 kultur ekitalditik gora eskainiko ditu propio jarritako Areto Nagusian, Ahotsenean, Saguganbaran, Kabi@n, Azoka TBn zein Zugaza zineman kokatuko den Irudienean, San Agustin Kultur Gunean egongo den Szenatokian eta Plateruena kafe antzokian.

Landako Gunean jarriko diren 247 standetan “158 argitaletxe, diskoetxe, kultur elkarte, erakunde eta banatzaile” egongo direla azpimarratu zuen Gerediaga elkarteko presidente Nerea Mujikak aurtengo edizioaren aurkezpen ekitaldian. Azokako erakusmahaietan “439 nobedade aurkitu ahal izango ditugu: 304 liburu, 93 disko, 18 aldizkari, argitalpen elektroniko bat eta 23 bestelakoak. Autoekoizleen plaza ere izango dugu bosgarren urtez, eta 17 autoekoizle egongo dira bertan”, Mujikaren esanetan.

Areto Nagusian kokatuko den Gogoetaren Plaza izango bada Azokaren ardatzetako bat, programazio zabala izango da gainontzeko guneetan. Ahotsenean, esaterako, 70 kontzertu eskainiko dira, tarteko Hesian, Gatibu edo Txapelpunk taldeen lan berrien aurkezpenak edo Pako Aristi, Alaine Agirre, Katixa Agirre, Harkaitz Cano edo Jon Arretxe idazleekin solasaldiak.

Irudienean berriz, ‘Soinujolearen semea’, ‘Muga deitzen da pausoa’ edo ‘Margolaria’ filmen aurre-estreinaldiak iragartzen dira eta Eszenatokian Hikaren ‘Txarriboda’ antzezlana, pieza laburren emanaldia edo Larrua Produkzioen ‘Baserri’ dantza ikuskizuna taularatuko dira.

Kontzertu nagusiak Plateruenan izango dira eta oholtza horretan Esne Beltza, Huntza, Anestesia, Modus Operandi eta Olatz Salvador izango dira.

La entrada 200 kultur ekitalditik gora eskainiko ditu Durangoko Azokak se publicó primero en durangon.com.

Ekimena goizeko 10.30ean hasiko da lehenengo kontzertuekin eta etengabe jarraituko du goizaldeko 2.30erarte. Talde baten eta bestearen arteko tarteak, musika jartzaileen saioekin beteko dira.

40 Minutu Rock jaialdian egongo diren taldeek ordu eta laurden inguruko ekitaldiak eskainiko dituzte. Ekimenaren izena berriz, Estatu espainiarreko kartzeletan preso daudenei bisitaldiak irauten dituen 40 minutuetatik dator.

Antolatzaileek musika zaletu gehienen gustuak betetzen ahalegindu dira eta horretarako pop, rock eta bestelako doinuak lantzen dituzten hamabi talde igoko dira agertokira. KOP katalanek metala, hardcore eta punk doinuak uztartuko dituzte eta Hesian eta Vendetta talde nafarren punk rock, hardcore edo ska doinuekin osatutako saioak ere iragartzen dira.

Hiru musika talde gerturatuko dira Lekeitiotik Landako Gunera. McOnak-en folk-rock errebeldean oinarritutako doinuez gain, Iñigito ezaguna taldekide duten Txapelpunk eta Etsaiak ere 40 Minutu Rock jaialdian izango dira.

Pixontxis

Elorrioko Pixontxis-en punk-rock musika; Eñaut Elorrieta buru duen Ken Zazpi taldearen doinuak eta euskal folka, rocka eta erritmo dantzagarriak egin egiten duen Garilak 26k osatuko dute talde bizkaitarren zerrenda.

Soziedad Alkoholikako gasteiztarrek hardcore, trash-metal, punk doinuak eta letra esanguratsuekin osatutako errepertorioa eskainiko dute eta Arabatik gerturatuko den En Tol Sarmientok (ETS) ska eta punk erritmoak gerturatuko ditu. Reggae, rock eta ska doinuak joko ditu ere Ze esatek! talde gipuzkoarrak.

La entrada Sarrera guztiak saldu dituzte larunbateko 40 Minutu Rock jaialdirako se publicó primero en durangon.com.