Iurretako herritarrek Karnabal jaiekin disfrutatu ahal izango dute zapatuan eta martitzenean, Udalak eta Aitte San Migel jai batzordeak elkarlanean antolatutako egitaraua prestatu baitute.

Zapatuko ekitaldiak 12:30ean hasiko dira Montoitik abiatuko den kalejirarekin, ibilbidea trikitilarien laguntzarekin egingo dela. 15:00etan, bazkari herrikoia hasiko da eta bazkalostean musika egongo da bertaratzen direnek alaitzeko.

Karnabaletako ospakizunak martitzen arratsaldean izango dute jarraipena, bi musika saio egongo baitira. 17:00etatik aurrera Ainhoa Djk jarriko du erritmoa eta 19:00etan Eingo taldeko kideen txanda izango da.

La entrada Iurretan bazkaria egingo dute zapatuan Karnabalak ospatzeko se publicó primero en durangon.com.

Durangoko Kriskitin dantza taldeak bere sorreraren 35. urteurrena ospatuko du bihar eta horretarako bi emanaldi eskainiko ditu San Agustin kultur gunean, 17:00etan lehena eta 19:30ean bigarrena. Jaialdiko ekitaldi bakoitzak ordu eta erdiko iraupena izango du.

Antzokiko agertokian 120 parte-hartzaile inguru azalduko dira, belaunaldi desberdinetako 100 dantzaritik gora eta 15 bat musikari arituko baitira. “Dantzarien artean Kriskitineko lehenengo taldeko partaide bat izango dugu, 70 urtetik gora dituena, eta gazteenak zazpi-zortzi urtekoa izango dira. Gainera, txistulariak, albokariak, dultzaineroak, trikitilariak eta soinujoleak izango dira”, Marisa Barrena taldeko kidearen esanetan.

Agerraldia osatzeko, Kriskitinen ibilbidean aurkeztutako ikuskizunen bat aukeratu beharrean, 35 urteko ibilbidean bildutako dantzak errepasatuko dituzte. “Guztira, Durangaldeko zein Nafarroako eta Arabako 20 dantza eskainiko ditugu”, zehaztu du Barrenak.

Urteurrena ospatzeko, dantza saio bat egitea pentsatu zuten, baina San Agustinek 320 ikusle-kopurua duenez, bi saio egitea erabaki zuten. Hala ere, aretoko eserleku guztiak bete ahal izango dira, dagoeneko 500 sarrera baino gehiago saldu dituztelako. Sarrerak 5 eurotan daude salgai.

Agerraldien ostean, ekitaldian parte-hartzailek afaria egingo dute, eta hor ere 100 lagunetik gora bilduko da.

La entrada 120 parte-hartzaile inguru bilduko dira San Agustin guneko agertokian Kriskitinen 35. urteurrenean se publicó primero en durangon.com.

Bizkargi Gogoratuz Elkarteak antolatutako Bizkargi Eguna ospatuko dute domekan Zornotza, Larrabetzu eta Morga batzen dituen mendi tontorrean. A

Egunari goizeko 11:00etan emango zaio hasiera trikitilariekin eta txistulariekin. Ondoren, 12:30ean, ‘Iragana, oraina eta geroa’ goiburu izango duen ekitaldia hasiko da. Jarraian, Bizkargi 1937 zapantzar taldearen eta Larrabetzuko Bizkargi Dantza Taldearen emanaldiak egongo dira.

Jarraian, Etxanoko Nagusiari harrera egin eta aginte-makina irudikatzen duen txuzoa emango diote. Bertsotan, Xabier Arriaga ‘Txiplas’, Onintza Enbeita, Etxahun Lekue eta Malen Amenabar arituko dira. Ondoren, Eneko eta Markelek kantaldia eskainiko dute.

13:15ean Dimako ‘Kantu bat gara’ taldearen kontzertuaren txanda helduko da eta, arratsaldean, berriz, Larrabetzuk hartuko du aldarrikapenaren eta festa giroaren lekukoa. Egun osoan zehar ez da janik eta edanik faltako Bizkargiko tontorrean.

Bizkargi Egunaren jatorria

Bizkargi Egunaren jatorria Gorozika, Morga, Etxano, Larrabetzu eta Muxikako parrokietako jendea eta udaletxeetako zinegotziak elkartzen zituen ospakizunean dago. Aspaldian, bertan bildutakoek Etxanoko jabetzakoa den ermitan meza entzun eta ondoren erromerian parte hartzen zuten. Erromeriari hasiera emateko, Etxanoko Udalaren ordezkariak ‘txuzoa’ lurrean sartu behar zuen ermitaren ondoan.

1936ko Gerran hainbat borrokaldi izan ziren Bizkargin euskal gudarien eta faxisten artean, tontorra behin eta berriro irabazi eta galduz. Borrokaldietan ehunka milizianok eta gudarik parte hartu zuten, batailoi desberdinetan antolatuta. 1937an ermita suntsituta geratu zen, baina urte batzuk geroago, 1943ko maiatzaren 16an, berriro eraiki eta inauguratu zuten.

Gerra osteko garaia

Gerra osteko hamarkadetan Santikurtzeak ospatzeari ekin zioten berriro nolabaiteko normaltasunez, meza eta erromeria famatu bilakatuz. Oroitzapen eta aldarrikapen eguna ere bazen, hildakoen senideek eta gudadiek ere parte hartzen zutelarik.

Azken hamarkadetan, Zornotzako Udabarri Dantza Taldea, AEK, Amnistiaren Aldeko Batzordea edo Etxanoko Andra Mari Elkartea arduratu dira Bizkargi Eguna antolatzeaz, testuinguru politiko-sozial berriei egokituta. Azken edizioak berriz, Bizkargi Gogoratuz Elkarteak hartu du bere gain antolakuntzaren ardura.

La entrada Aldarrikapena eta jai giroa ez dira faltako domekako Bizkargi Egunean se publicó primero en durangon.com.