Abadiñoko Udalak eskaintzen duen AbadiñoSex zerbitzua berriro dago martxan eta astelehenero ateak irekita izango ditu, 17:00etatik 19:00etara Traña-Matienako Pinu lokaletan. Gazteei zuzendutako sexualitateari eta generoari buruzko informazio eta aholkularitza zerbitzuak eskaintzen ditu.

AbadiñoSex-ek profesionalekin hitz egiteko, zalantzak argitzeko eta gogoeta egiteko konfiantzazko gunea izan gura du. Ikasturtean zehar, hitzaldiak, prestakuntza-tailerrak eta komunitatearentzako jarduerak ere antolatzen ditu, eskola-esparruan duen programaz gain.

Informazioa behar duen edonor sexuaholkularitza@abadiano.eusk helbide elektronikoaren bidez jar daiteke harremanetan, eta Instagramen (@abadiñosex) informazioa ematen da. Sentsibilizazio-kanpainak ere etengabe zabaltzen dira.

Hala, Berdintasun eta Aniztasun Sailetik parte-hartzeko deia egin zaie nerabeei eta gazteei, baita gurasoei, irakasleei, hezitzaileei, eta inguruan dituzten pertsonei ere.

AbadiñoSex-ek jarraipena emango dio aurten programari eskola-komunitatean, ikasleei, irakasleei eta familiei zuzendutako tailerrekin. “Funtsezkoa da genero-ikuspegitik alderdi  sexualean eta afektiboan hezten jarraitzea, indarkeria matxista prebenitzeko”,  Rosa Miguel Berdintasun eta Aniztasuneko zinegotziaren esanetan.

La entrada AbadiñoSex-ek Traña Matienan duen bulegoa berriro irekita dago se publicó primero en durangon.com.

Abadiñoko Udalak kultur eta aisialdi ekitaldiak prestatu ditu datorren martitzenean ospatzen den LGBTIQ+ Harrotasunaren Nazioarteko Egunaren harira. Antolatutako saioekin, LGBTIQ+ kolektiboaren ikusgaitasun soziala eta publikoa ikusarazi eta sexu-orientazioagatik eta genero-identitateagatik diskriminazioa desagerraraztea sustatu nahi dute.

Harrotasunaren Eguna ospatzen den martitzenerako, 13 eta 16 urte bitarteko gazteentzako graffiti-tailerra programatu da. Ekitaldia Traña-Matienako Galizia plazan egingo da 10:00etatik 13:00etara eta parte hartzeko izena eman behar da aldez aurretik Mediatekan, Errota Kultur Etxean edo udalaren webgunean (Zerbitzuak – Gazteria – Gazte Uda).

Sorkuntza proposamena LGTBIQ+ pertsonen eskubideen aldeko Nazioarteko Egunak sustatzen dituen koloreen eta berdintasun- eta aniztasun-balioen ingurukoa izango da.

Manifestazioa

Arratsaldeko 19:00etan, Mugimendu Feministak antolatutako manifestazioa egongo da Traña-Matienan, aldarriei ikusgaitasuna emateko eta sexu-askapenaren inguruan sentsibilizatzeko.

Eguenean, narrazioa, antzerkia eta bertsoak batzen dituen ‘eRRe’ ikuskizuna eskainiko dute Haizea Arana, Leire Vargas, Aner Euzkitze eta Ohiana Aranak, 19:00etatik aurrera Trañabarren plazan. Edurne Azkaratek zuzendurako ikuskizunak genero-ikuspegia hartzen du ardatz, “LGTB+ kolektiboak arauaren baitan hartzen duen lekua,  gazte izatearekin lotutako zapalkuntzak, eta horiek bertsolaritzan hartzen duten forma” izango dute aztergai.

Yogurinha Borova

Proposamen horren ondoren, 21:00etan, Yogurinha Borovaren ikuskizuna egongo da Zarrako aparkalekuan.

Abadiñoko Udaleko Berdintasun eta Aniztasun zinegotzia Rosa Miguelen esanetan, “aurrera jarraitu behar dugu gizarte integratzaileagoa, ekitatiboagoa eta sexu-, genero- eta orientazio-aniztasunarekiko solidarioagoa eraikitzen, eta sexualitatea bizitzeko eta generoa adierazteko modu guztiak erabat aitortu eta errespetatu behar ditugu”. Hori dela eta, “garrantzitsua iruditzen zaigu gazteenekin lan egitea, sakoneko lana da, baina gizarte bidezkoagoaren alde egin behar dugu, gura dugun gizartearen alde”.

Egun hauetan, Abadiñoko udal eraikinek sexu aniztasunaren aldeko pankartak izango dituzte. 

La entrada Antzerkia eta graffitiak egongo dira Abadiñon LGTBIQ+ pertsonen Nazioarteko Eguna ospatzeko se publicó primero en durangon.com.