Abadiñoko Mendiola auzoak San Kristobal jaiak ospatuko ditu bihartik domekara bitartean eta Errekatxo auzo elkarteak antolatutako egitarauan, musika kontzertuak eta erromeriak, lehiaketa gastronomikoak eta dastaketak, Eixu artisau eta ekoizleen azoka eta Jose Antonio Azkorbebeitiari egingo dioten omenaldia nabarmentzen dira.

Ospakizunak bihar bertan hasiko dira, 18:00etan, auzotarrek Errekatxotik eramango duten Donien atxa altxatzearekin. 21:00etan berakatz-zopa dastatzeko aukera egongo da eta 22:30ean Lukiek eta Liher taldeek eskainitako kontzertua hasiko da.

Abadiñoko auzo desberdinetatik bertaratzeko, doako autobusa jarriko du Udalak. Irteerak 21:30ean, 22:00etan eta 22:30ean izango dira Traña-Matienako eskolaren paretik, eta Zelaietan eta Muntsaratzen (Bizkaibusen geralekuetan) geldituko da. Itzulerak, 02:00etan, 03:00etan eta 04:00etan izango dira.

Zapatuko egitaraua goizeko 11:00etan irekiko den Eixuren artisau eta ekoizleen azokarekin abiatuko da. 13:30ean iazko abenduan hil zen Jose Antonio Azkorbebeitia omenduko dute Alluitz dantza taldearen eta lagunen partaidetzarekin. Ondoren ‘maleta siku’ bazkaria egongo da Onintza Enbeita eta Eneko Abasolo ‘Abarkas’ bertsolariek girotuta.

Herri kirolak

Arratsaldeko 19:00etan tortila txapelketa hasiko da eta 22:00etatik aurrera Luhartzek girotutako erromeria egongo da.

Domeka arratsaldean Zelaitarren eta Abadiñoko Sokatira taldearen arteko herri kirol erakustaldia egongo da eta iluntzean parrillada egongo da KSKA Selektorrak girotuta.

Astelehenean meza egongo da 11:00etan eta ondren gazta, ogia eta ardoa dastatzeko aukera egongo da. 13:00etan bolo eta ugasixo txapelketak jokatuko dira eta 14:00etan zozkatuko den errifarekin eta Donien atxa botatzearekin amaituko dira ospakizunak.

La entrada Lukiek eta Liher taldeek eskainiko dituzten kontzertuekin hasiko dira bihar Mendiolako jaiak se publicó primero en durangon.com.

Jose Antonio Azkorbebeitiak (ezkerrean) esatari lanak egin ditu ETBrentzat azken urteetan.

10 artzain eta 11 txakur lehiatuko dira datorren zapatuan Atxondoko Axpe elizatean Euskal Herriko Artzain Txakur Txapelketaren 52. edizioan. Lehiaketan, Hego Euskal Herriko probintzia bakoitzeko txapeldunak eta txapeldunordeak; Iparraldeko txapeldunak eta txapeldunordeak eta iazko irabazleak, Aresoko Antonio Alustiza eta Jai, izango dira nor baino nor gehiago.

Aresoko artzainak beste aukera bat ere izango du txapela janzteko, izan ere, berak eta Jaik lortu dute Nafarroako txapelketa eta, ondorioz, hirugarren postuan sailkatutakoak ere eskubidea du txapelketan parte hartzeko. Eta postu hori Alustizak berak eta Azke txakurrak lortu zuten. Nafarroako ordezkaritza Arruazuko Aritz Ganboak eta Suak osotuko dute.

Bizkaiko ordezkari biak Orozkokoak dira, lurraldeko txapeldunak Eneko Serrano eta Gala izan baitziren eta txapeldunordeak Enrique Mendiguren eta Riki. Arabako ordezkariak Aretako Fidel Alonso eta Luky eta Olabezarreko Asier Bolibar eta Kobi izango dira; Gipuzkoatik Oñatiko Jose Maria Bengoa eta Eder eta Ataungo Aitor Tato eta Nabar gerturatuko dira eta Iparraldeko ordezkariak Itxasoko Jean Paul Iriken eta Lehial eta Heletako Juan Miura eta Luk izango dira.

50 urte antolakuntzan

Aurtengo txapelketak 52. edizioa beteko du eta urteurren borobil bat ere izango du, Gerediaga Elkarteko bazkidea den Jose Antonio Azkorbebeitiak 50 urte beteko baititu antolaketa lanetan. Txapelketaren ardura abadiñarrari egokitzea ez zen harritzeko “artzain etxekoa semea nintzelako eta 14 urte bete arte ardiekin ibiltzen nintzelako”, aitortzen du Azkorbebeitiak.

Franco bizi zen garaian sortutako lehiaketa izanik, hasierako urteetan “Campeonato de perros de pastor vasco-navarro deitzen zen”, gogoratzen du Azkorbebeitiak. Izenarena ez da txapelketak izan duen aldaketa bakarra, “nahiz eta lehiaketak hasierako zentzu berdina duen; hau da, artzainak eta txakurrak ardiarekiko duten harremana baloratzea. Aldatu diren gauzak txapelketa osotzearren egin dira”.

Gerediagak antolatutako txapelketaren bidez “euskal artzain txakurraren presentzia bultzatu” nahi izan dela aitortzen du Azkorbebeitiak eta azken urteetan Hego Euskal Herriko artzainak bertako arrazako artzain txakurrekin lehiatzen badira ere “Iparraldekoek oraindik border collie arrazakoekin lan egiten dute”.

Gerediaga elkarteak Atxondoko Udalaren, Draxton enpresaren, Atx-Azpi elkartearen, Euskal Herriko Artzain Txakurren Elkartearen (EHATE) eta Urkiola Landa Garapenerako Elkartearen laguntzarekin antolatutako lehiaketa 17:30ean hasiko da. Sarrerak 4na eurotan salduko dira.

La entrada Iaz lortutako txapela defendatuko dute Atxondon Antonio Alustiza artzainak eta Jai txakurrak se publicó primero en durangon.com.