Ekimen ugari eskainiko ditu Zapatu Blai ekimenak ikasturtean zehar.

Zaldibarko Udaleko Euskara Zerbitzuak ekimen ugari prestatu ditu euskararen erabilera ume, gazte zein helduen artean indartzeko helburuarekin. 2019-2020 ikasturtera begira, zaldibartarrak aisialdi programetan, euskarazko eskoletan zein Berbalagun ekimenean parte hartzeko aukera izango dute.

Hiru eta hamaika urte bitarteko umeek urriaren 5etik ekainaren 20ra arte garatuko den ‘Zapatu Blai’ ekimenean parte hartzeko aukera izango dute. Hiru adin taldetan banatuta, umeek hamabostean behin izango dute hitzordua, arratsaldeko 16:00etatik 19:00etara burutuko diren saioetan.

Lagun artean gozatzeaz eta ondo pasatzeaz gain, ekimen horren hartzaileak gizakia zein naturarekiko errespetuan oinarritutako jardueretan parte hartzeko aukera izango dute.

Zaldibartarrek lehentasuna izango dute ‘Zapatu Blai’n parte hartzeko eta izena emateko orduan Kutxabank edo BBVA banketxetan egindako 40 euroren ordainketaren agiria eraman behar da Udaletxera. Apuntatzeko epea datorren astelehenean, hilak 16, amaitzen da.

Gazte Lekua

12 eta 16 urte bitarteko gaztetxoentzat prestatutako ‘Gazte Lekua’ ekimenak ekintza desberdinak iragartzen ditu asteburuero, saioak bariku, zapatu eta domeketan izango baitira, 17:00etatik 20:30etara bitartean. Irailaren 13tik uztailaren erdialdera arte, Olazar futbol zelai zaharrean jarritako txokoan ikastaroak, irteerak, jai bereziak, eskulanak zein sukaldaritzako tailerrak eta beste hainbat ekimenetan parte hartzeko aukera egongo da.

‘Gazte Lekua’n parte hartzeko baldintza bakarra euskaraz jardutea da eta bertako ekimenetan parte hartzeko bertaratzea besterik ez da behar.

“Euskara ikastea merezi duelako” goiburuarekin, euskarazko eskolak eta Berbalagun ekimenak ere prestatu dira. Ikasturte honetarako euskalduntze maila guztietako ikastaro presentzialak zein autoikaskuntzarako on line ikastaroak eskaintzen dira, baita HABE zein Hizkuntza Eskolako agiriak lortzeko egokitutakoak.

Udal Euskara Zerbituzuak AEKrekin elkarlanean prestatutako eskaintza, guraso taldeei, etorkinei zein ikastaro trinkoak nahi dituztenei zuzenduta daude. Gainera, berba egiteko Berbalagun zein Gurasolagun talde ez formalak prestatu dituzte.

Matrikulazioa egiteko epea irailaren 20an amaitzen da. Izenea emateko beharrezkoa da Udal Euskara Zerbitzuko 946827016 telefonora deitzea edo eguen@zaldibar.eus korreo elektronikora idaztea, edo AEKra deitzea edo idaztea (946817349 / 662966827 edo zaldibar@aek.eus).

La entrada Jarduera ugari prestatu ditu Zaldibarko Udalak ikasturte berrian euskararen erabilera sustatzeko se publicó primero en durangon.com.

Durangaldeko euskaltegiek, Hizkuntza Eskolak eta Euskara zerbitzuek bultzatutako ekimena da Berbalagun egitasmoa.

Euskaltegi eta kalearen arteko zubi lana egiten duen Berbalagun egitasmoaren edizio berri bat hasi dute dagoeneko Durangaldeko euskaltegiek eta Hizkuntza Eskolak. Ekimenaren eragileek ‘Praktikatu eta bizi!’ lelopean egingo den 2017-2018 ikasturtea parte hartzeko eta euskaraz gozatzeko gonbitea egin dute.

Berbalagun egitasmoan edozeinek har dezake parte, euskaldun zahar, euskaltegiko ikasle zein euskaraz mintzatu edo ikasi nahi dutenek. Iaz 200 pertsonek parte hartu zuten “eta aurreikuspenen arabera aurtengo datuak ere ez direla makalak izango”, eragileen esanetan.

Ikasitako euskara praktikatzeaz gain, partaideek jende berria ezagutu, euskararen munduan murgildu eta, azken finean, euskaraz bizitzeko aukera izango dute. Izan ere, partaideei eta gainontzeko herritarrei zuzendutako ekintza osagarriak antolatzen dira eta urtero egin ohi diren kultur lehiaketa edo mintzodromoaz gain, aurten bestelako ekintza batzuk ere aurreikusita daude, besteak beste, ikastaroak, tailerrak, hitzaldiak, lehiaketak eta irteerak.

Antolatutako ekimenetan doan parte hartu ahal izateaz gain, Berbalagun guztiek bidaia eta egonaldietarako deskontuak, AIZU! eta Argia aldizkariak eta Berria egunkaria merkeago eta beste hainbat abantaila eskuratu ahalko dituzte.

2017-2018ko Berbalagun ekimenean parte hartu nahi dutenek Durangaldeko AEK euskaltegietan, Durangoko Udal Euskaltegian, Hizkuntza Eskolan, Udaletako euskara zerbitzuetan edo kultur etxeetan izena eman behar dute, baita 639 400 786 telefonoan edo durangaldea@aek.org e-mailean. Informazioa gehiago nahi duenak www.durangaldea.blogspot.com blog-a bisitatu dezake.

La entrada ‘Praktikatu eta bizi!’ lelopean egingo da 2017-2018 ikasturteko Berbalagun egitasmoa se publicó primero en durangon.com.