Bizkaiko Taldekako bertsolari txapelketaren laugarren edizioa barikuan, hilak 15, hasiko da, eta aurten lehiatuko diren 16 taldeetatik lau eskualdeko bertsolariek osatuko dituzte.

Durangoko ‘Laukijjek’ taldeak txapelketako lehen kanporaketan parte hartuko du, Gernika-Lumoko Harizpe txokoan, 20:00etatik aurrera. Igor Galarza, Bittor Salterain, Paulo Salterain, Unai Iturriaga, Erika Lagoma eta Ander Elorriagak osatzen duten taldeak Busturialdeko LauBururekin neurtuko ditu indarrak txapelketari hasiera emango dion norgehiagokan.

Lehiaketan arituko den eskualdeko bigarren taldea ‘Durangaldekuek’ izango da. Iruri Altzerreka, Araitz Katarain, Ainhoa Urien, Miren Amuriza, Ixone Asategi eta Irune Basagoiti biltzen dituen taldea Urdulizen arituko da apirilaren 20an, eta Plentzia, Gorliz, Lemoiz eta Urdulizeko kideekin osatutako ‘Pirata bertso-taldea’ izango du aurrez aurre.

‘Zornotzako bertso oskola’ osatzen duten Ander Aldazabal, Beñat Romero, Alain Barañano, Ander Gerrikaetxeberria, Iñaki Iza, Xabier Irakulis eta Iker Pastorrek herrian jokatuko dute kanporaketa Larrabetzuko ‘Itallen’ekin. Hitzordua apirilaren 28an, 12:00etan, jarrita dago.

Azken kanporaketa Iurretan jokatuko da maiatzaren 3an, 21:00etan, eta bertan Durangaldeko ‘Urruxarrak’ taldea osatzen duten Alaitz Areitio, Gorka Lazkano, Peru Magdalena, Hodei Zenikaonandia, Txomin Magdalena eta Eneko Abasolo ‘Abarkas’ek kantatuko dute. Lehiakideak Gernika-Lumoko ‘Zapatilapeko txikliek’ izango dira.

Edizio hau zortzi kanporaketekin hasiko da eta saio bakoitzeko irabazlea  finalaurrekoetarako sailkatuko da; 9. finalista zozketaz erabakiko da. Bederatzi taldeek hiru finalaurreko jokatuko dituzte maiatzaren 25ean Arrigorriagan eta egun berean jokatuko da finala ere. Egun horretan, gainera, Eskolarteko txapelketaren finala ere jokatuko da.

Formazio saioa Durangon

Bizkaiko Bertsozale Elkarteak antolatutako txapelketak “bertso eskolak eta eskualdeak indartu” nahi ditu. Helburu horrekin “bertsolari hasi berriei plazarako bidea erraztea” nahi du, eta ohiko txapelketan parte hartzeko motibaziorik ez dutenei aukera bat eskaini nahi die.

Horrez gain, antolatzaile, epaile eta gai-jartzaile berrien sorrera ere bultzatu nahi du eta horretarako Durangon, martxoaren 20an, egingo diren gai-jartzailetza eta epailetza ikastaroak antolatu ditu. Saio hauek taldekakoan parte hartuko dutenei zein interesa izan dezakeen beste edozeini zuzenduta daude.

Epailetza ikastaroa 17:00etatik 18:30era izango da eta hizlariak Iñaki Aurrekoetxea eta Graxi Arregi izango dira. Gai-jartzailetza ikastaroa, ostera, 18:30etik 20:00etara izango da eta Idoia Anzorandiak gidatuko du.

Izen ematea martxoaren 18ra arte egin daiteke bizkaia@bertsozale.eus helbidera idatzita edo 94 6812711 telefonora deituta.

La entrada Eskualdeko 25 partaide lau taldetan batuko dira Bizkaiko Taldekako bertsolari txapelketan lehiatzeko se publicó primero en durangon.com.

Iurreta eta Abadiñoko bertso taldeak ekainaren 3an Markina-Xemeinen jokatuko den finalean egongo dira.

Abadiñoko Koipelustre’s-ek eta Iurretako Bertso Taldiek, Bizkaiko Taldekako Bertsolari Txapelketaren finalerako txartela lortu dute asteburuan jokatutako bi finalaurrekoen ondoren. Abadiñarrek barikuan Berrizen jokatutako lehen saioa irabazi zuten eta zapatuan Iurretako Bertso Taldie gailendu zen Ispaster eta Eako Bedarun jokatutako bigarren finalaurrekoan.

Berrizko Fondan, Guzurren eta Ganeko-etxen  barikuan jokatutako lehen finalaurrekoan Berriz eta Garaiko kideek osatutako ‘Tire!’ eta Leioako ‘Leiora begira’ taldeak lehiatu ziren, azkenean irabazleak izan ziren ‘Koipelustre’s’ekin batera.

Abadiñoko taldekideak Beñat Gaztelurrutia, Txaber Altube, Aitor Bizkarra, Ainhoa Urien, Nerea Azkarate, Kati Simon, Igor Galarza, Garikoitz Sarriugarte, Itsaso Gangoitia eta Ione Narbaiza dira.

Bigarren finalaurrekoa Eako Bedarun eta Ispasterren jokatu zen eta bertan bigarren faserako sailkatutako lau talde izan ziren. Saioko irabazleak ‘Iurretako Bertso Taldie’z gain, Busturialdeko ‘El Consorcio’, Bilboko ‘Santutxuko Bertso Eskola’ eta Ispasterko ‘Ipiztar’ taldeak aritu ziren.

‘Iurretako Bertso Taldie’ Eneko Abasolo ‘Abarkas’, Juan Mari Areitio, Justo Alberdi, Kristina Mardaras, Alaitz Areitio, Ander Duñabeitia, Eñaut Aiartzaguena eta Jon Jaiok osatzen dute.

Finala jokatu aurretik, hirugarren kanporaketa jokatu behar da Bermeon, barikuan, eta bertan ez da egongo eskualdeko ordezkaririk. Partaideak, Markina-Xemeingo ‘Akerbeltzen antxumak’, Larrabetzuko ‘Itallen’ eta Busturialdeko ‘Buruz-buru’ izango dira.

Egun osoko egitaraua

Markina-Xemeinen ekainaren 3an jokatuko den finala arratsaldeko 17:00etan hasiko da eta ekitaldia hasi aurretik Bizkaiko Bertsozale Elkarteak eta Ikastolen Elkarteak antolatutako hainbat ekitaldi egongo dira.

Goizeko 10:00etatik aurrera eskolarteko bertso idatzien finala eta eskolarteko bat-bateko sariketaren finala izango dira, besteak beste. Bazkalostean, Bizkaiko Taldekako Bertsolari Txapelketaren finala jokatuko da eta sari banaketaren ondoren Joxpa taldeak girotutako erromeria egongo da.

La entrada Abadiñoko Koipelustre’s eta Iurretako Bertso Taldie Bizkaiko taldekakoaren finalean egongo dira se publicó primero en durangon.com.