Urtero bezala, irailean, Zornotzako udal euskaltegiak, AEK-k eta barnetegiak kurtso berriari begira aurtengo eskaintza zabalaren berri eman dute. Izen – ematea zabalik dago, eta denek helburu berdina dute, gizartea euskalduntzea eta euskara komunikazio hizkuntza bihurtzea.

Zornotzako udal euskaltegiak aurreko urteetan funtzionatzen duena mantentzea erabaki du, hau da, ohiko ikastaroak, urritik ekainera astean lau egunetan ematen direnak, eta helburu zehatzetara bideratutako hainbat. Iaz funtzionatu ez zuten autoikaskuntza eta modelo mistoa baztertu egin dituzte.

Ohiko ikastaroez gain, orain dela bi urte martxan ipinitako etorkinentzako AISA ikastaroa, eta pasadan urtean nagusientzako sortutako ikastaroak mantendu egiten dira. Gainera aurten, merkatari eta tabernariei bideratutako ikastaro berri bat martxan jartzen saiatuko dira.

Udal euskaltegiak, ikasle koruari begira, %20an gora egin du azken hiru urteetan. Pasadan urtean 212 ikasle izan zituzten eta 2013 – 2014 ikasturtean 172. Aurreko urteetan bezala langabetuek udaletik diru laguntzak jasoko dituzte, matrikula eta ikasturtea 10 eurokoa izango da.

Zornotzako AEK-k ere euskaraz ikasteko ohiko ikastaroak eskaintzen ditu, eta horrez gain, beste eskakizun zehatzagoei erantzuna emateko ikastaroak dituzte, esaterako, C2 ikastaroa. Autoikaskuntza ere AEK-ren eskaintzaren barruan dago.

Mintzamena lantzeko

Garrantzi handia ematen diote mintzamenari, horregatik, mintzamena lantzeko ikastaroa eskaintzen dute. “Ikaste prozesua mintzamenean oinarritu behar da, ahotik papera pasatu behar gara”, azaldu zuen Julio Aranguenak, AEK-ko arduraduna.

Barnetegian aldiz,  “euskaraz bizitzeko aukera eskaintzen dugu, hori da gure jardueraren ardatza”, azaldu zuen Marivi Zubiagak, Zornotzako Barnetegiko zuzendaria.  Autoikaskuntza ikastaroak ere badute, eta baita eskola eta enpresetan ikastaro espezifikoagoak eskaintzen dituzte.

La entrada Udal euskaltegia, AEK eta barnetegiko eskaintza Zornotzan euskara ikasteko se publicó primero en durangon.com.