Izurtzako herritarrak eta bertaratzen direnek, iraileko lehenengo bi asteburuetan ospatzen diren jaiekin disfrutatzeko aukera izango dute bihartik aurrera. Egitarauan, ohiko tortilla eta paella txapelketak, bazkari eta afari herrikoiak, Lotxo eta Luhartz taldeen erromeriak eta GertuFest ekimena nabarmenduko dira.

Jaiei hasiera bihar emango zaie, iluntzeko 20:00etan piztuko duten txupinazoa eta ondoren egingo den trikipoteoarekin.

Itsaski paella lehiaketarekin eta ondoren egingo den enkarteladak emango diete jarraipena ospakizunei, etzi eguerdian. Prestatutako jakien aurkezpenarekin, ondoren egingo den herri bazkariarekin eta 18:00etan hasiko den karaokearekin osatuko da eguneko egitaraua.

Domekan ospatuko duten ‘Santa Ageda egune’, Jaizale Durangaldeko txistulariek 10:00etan hasita eskainiko duten kalejirarekin abiatuko da. Eguerdian, Iurretako Dantza Taldearen ekitaldia egongo da. 14:30ean hasita herri bazkaria egongo da eta arratsaldean Manbo bingoa eta Lotxo taldearen erromeria egongo dira.

Eguen arratsaldean jarraituko dute ospakizunak, umeentzat egongo diren jolasekin eta txokolatadarekin.

Barikuan, 17:00etatik aurrera, artea, kultura, eta festa uztartzen dituen GertuFest ekimena egingo da Santo Tomas parkean. Bertan egongo diren artisauak Art-Izar, Birak, Mai Mai sorkuntza, Kukupraka, Amalur, Aromatika shop, Ane, Airean hula-hoop, eskuArte, Biezko, Aratz Azpiri, Kenika eta Warmi Lurra izango dira. Artistak berriz, ‘El golpe’ mikroantzerkia eskainiko duen Cía Las Paralelas, graffitiak egiten dituen Txarli, ‘Siroko’ klown lana eskaintzen duen Parena konpainia, dantza garaikidea egiten duen Bagara kolektiboa, Joni Txintxes eta Billi Ladillas musikariak, urban dancea egiten duten Jammers eta bakarrizketak eskaintzen dituzten Maite Lopez eta Gorka Madrazo izango dira.

Tortilla txapelketa eta Luhartz

Izurtzako jaietako ekitaldi aipagarrienetakoa den tortilla txapelketa datorren zapatuan jokatuko da, arratsaldeko 19:00etan hasita. Iluntzean, afari herrikoia egingo dute eta eguna borobiltzeko Luhartz taldeak girotutako erromeria egongo da.

‘Santo Tomas egune’ ospatuko dute domekan, 10:00etan Jaizaleko txistulariek eskainiko duten kalejirarekin hasita. Eguerdian, Lopene eta bere abereen ekitadia, igel txapelketa eta jubilatuen bazkaria egingo dira. Arratsaldean, Argintxu elkartean jokatuko den mus txapelketarekin eta ordu berean hasiko den partxis txapelketarekin osatuko da aurtengo egitaraua.

Argazki lehiaketa

Bestalde, Izurtzako Jaietako argazki lehiaketaren VI. ediziora irudiak aurkezteko epea,  irailaren 30a arte egongo da irekita. Aurten, 150, 100 eta 75 euroko sariak banatuko ditu.

Edonorentzat irekita dagoen lehiaketara aurkezten diren lanak JPG eta paperean helarazi behar dira, eta partaide bakoitzak, gehienez, hiru argazki aurkeztu ditzake.

Irabazleak izenak urriaren azken astean emango dira ezagutzera Izurtzako Udalaren web orrian, eta aurkeztutako argazki guztiekin erakusketa egin ahalko da abenduaren 6an.

Izutzako jaiak 2022. Egitaraua

La entrada Paella lehiaketa eta herri bazkaria egingo dituzte zapatuan Izurtzako jaiei hasiera emateko se publicó primero en durangon.com.

Elorrioko Udalak 2021erako egingo duen euskarazko egutegia osatzeko argazki lehiaketa deitu du eta bertan agertuko diren irudiak konfinamendu egun hauetan ateratakoak izan behar dira. Maiatzaren 31ra arte bidali daitezkeen irudiek “konfinatuta gauden bitartean etxean bizi ditugun uneak edo etxeko balkoitik edo leihotik ikusi duguna” erakutsi behar dute.

Lehiaketara aurkeztu ahal izango diren argazki edo ordenagailuz egindako edozein argazki-konposizioek, 2021eko hamabi hilabeteak zein azala osatzeko erabiliko dira eta, ondorioz, 13 irudi aukeratuko dira guztira.

Parte hartzea 16 urteko elorriarrei mugatuta dago eta ezinbestekoa da argazkiak norberaren etxean edo balkoi eta leihotik ateratakoak izatea. Irudiek bertan bizitako uneak, bertatik ikusten den paisaia edo giza-paisaia erautsi dezakete, besteak beste.

Gehienez bi lan aurkeztu ahal izango ditu egile bakoitzak, 346 mmko zabalerarekin eta 253,5 mmko altuerarekin. Lanak jpg formatuan, 300pppko erresoluzioarekin, CMYK kolore ereduarekin eta, asko jota, 6 Mbko pisua izan dezakete.

Irudiak elorrio@elorrio.eus helbide elektronikora bidali behar dira eta bertan egingo da izena ematea ere, ‘2021 egutegia’ goiburua jarrita. Mezuan NAN, telefono zenbakia eta  argazkien izenburuak jarri behar da.

Aukeratzen diren hamahiru argazkiek 60 euroko txartel bana jasoko dute Elorrioko saltegietan erabiltzeko. Adingabeen kasuan, txartelen balioa gurasoei edo tutoreei emango zaie.

La entrada 2021eko egutegia egiteko argazki lehiaketa deitu du Elorrioko Udalak se publicó primero en durangon.com.

Barikuko Mintzopoterako izena emateko epea gaur amaitzen da.

Iurretako Udalak eta Euskararen Aholku Batzordeak, euskararen erabilera bultzatu nahi duen Mintzopotea ekimena egingo dute bariku arratsaldean. Euskaraz eta euskararen inguruan berba egiteko gonbitea egiten duen ekimenak hirugarren edizioa beteko du aurten eta berrikuntza ugari izango dira.

Arratsaldeko 19:00etan Dantzari auzunean (edo eguraldi txarra eginez gero Askondo kaleko aterpean) hasiko den ekimeneko partaideek edalontzia izango dute esku batea, pintxoa bestean eta mingainak berba egiteko prest. Antolatzaileen arabera “euskararen inguruan eta euskaraz jolastu eta gure kontuen gainean berba egingo dugu”.

Ekimenean parte hartu nahi duenak, gaur du izena emateko azken eguna. Inskripzioa 946201200 telefono zenbakian edo idazkaritza@iurreta.eus helbidera bidalitako e-mail baten bidez egin daitezke.

Mintzopotea 20:30ak aldera amaituko da eta jarraian Ikimilikiliklik argazki-lehiaketaren sariak banatuko dituzte. Apirilean zehar burututako lehiaketak euskararen aldeko mezu politenak eta argazki originalenak sarituko ditu, eta irabazleek talde-bazkari batekin gozatzeko aukera izango dute.

Mintzopotearen inguruan antolatutako ekimenak ume eta gaztetxoentzat gozagarri izango den Go!azen karaokea izango da Askondo kaleko aterpean eta ekitaldia Iban Garcia youtuberrak aurkeztuko du.

La entrada Barikuan egingo dute Iurretan euskaraz egiteko gonbitea luzatzen duen Mintzopotea se publicó primero en durangon.com.