53. edizioaren ateak ireki eta lasterrera Landakon jarritako erakusmahaiak Euskal Herria osotik gerturatutako ikasleekin bete ziren. Gazteek egindako erosketak diskoetan nabarmendu ziren gehien bat, nahiz eta libururen bat edo beste ere erosi zuten. Hainbat gaztetxo zintzo-zintzo ibili zen irakasleek agindutako lanak betetzen eta beste hainbatek Azokako zazpi gunetan eskainitako tailerretan parte hartu zuen.

Ikasle Eguna izateaz gain, DAren lehenengo eguna Inaugurazio ekitaldiaren eguna ere bada. Bertaratutako agintariek eta antolatzaileek Azokak duen garrantzia nabarmentzeaz gain, “euskararekiko jarrera aktiboa” izateko gonbitea egin zuen Nerea Mujika Gerediaga elkarteko presidenteak. Durangoko Azoka “bizitzeko modu asko daudela” adierazteaz gain, Euskaltzaindiaren mendeurrena betetzen dela eta euskara batuaren 50. urteurrena gogoratu zituen eta azken ekimen horrek “Gerediagaren babesa” izan zuela aipatu zuen Mujikak.

“Jaialdirik bikainena”

Durangoko Azoka “gaur euskal kulturak duen jaialdirik bikainena bihurtu da” eta kulturaren zeregin nagusia “ongizatea sortzea” dela azpimarratu zuen Bingen Zupiria Eusko Jaurlaritzako Kultura eta Hizkuntza Politikako sailburuak. Hala ere, bere berbaldian Euskal Herriko kulturaren mapa izan zuen mintzagai eta “anitz izen dituen euskal kultuaren mapa hori txikia” dela adierazi ondoren, “erabiltzaileen komunitatea osatzen dugun gizon-emakumeak ez gara milioira iristen; estu hartuz gero igual erdira ere ez”, aitortu zuen.

Durangoko Azokaren eta amaitu berri den Euskaraldiaren garrantzia bateratu zituen Ana de Castro Bizkaiko Foru Aldundiko Euskara zuzendariak, horrelako ekimenak “argi erakusten digute denok garela beharrezkoak gure kultura bizitzeko, biziberritzeko eta biziarazteko”.

Durango eta herriko azpiegiturak prest daudela egun hauetan hurreratuko diren “euskaltzale guztiendako”, adierazi zuen Aitziber Irigoras alkateak. “Eta durangarrak ere prest dagoz noski, domekara bitartean etorriko diren pertsona guztiak gurean hartzeko”.

Irekiera saioa aurtengo kartela diseinatu duen Txakur Gorria sormen kolektiboaren ‘Digara’ ikuskizunarekin osatu zen. Taldeko lau neskak argi utzi zuten aurtengo leloa den ‘DA. Asko dira!’, esanahi anitz dituela eta hasien jarritako  ‘Asko dira’ren ordez, ‘Asko gara’ aldarrikatu zuten.

Sormen beka rol joko bati

Gaur goizean lehenengoz deitutako Sormen bekaren irabazlea eman da ezagutzera eta irabazlea Etzi Portu Maritimoa taldeak aurkeztutako ‘ATOPIArpg’ proposamena izan da. Guztira 28 ideia aurkeztu dira eta epaimahaiak “rol joko bat euskaraz, literatura fantastikoaren eta jolas kolektiboaren gurutze-bidean” dagoen egitasmoa aukeratu du.

Zortzi kideek aurkeztutako proposamena datorren urteko Durangoko Azokan aurkeztu behar da eta horretarako 15.000 euroko beka izango dute.

Etzi Portu Maritimoa taldeko kideen esanetan “gabezia batetik abiatutako proiektua da honakoa, euskarazko rol-jokoetan dagoen hutsunea betetzera datorrena”. Proiektuak “euskaraz sortu eta argitaratutako lehen rol jokoaren liburua” izango bada ere, “adierazpide ezberdinak lantzen saiatzen ari gara, blog, sare sozial eta irrati bidez euskarazko rol jokoen posibilitateak aztertzeko” sortzaileen arabera.

Eguen honetarako prestatutako egitarauak proposamen ugari eta erakargarriak iragartzen ditu. Esate baterako, Gogoetaren plazan, eguerdian, Benito Lertxundirekin solasaldia izango da; Ahotsenean hainbat zuzeneko kontzertu eta argitalpenen aurkezpen egongo da, Harkaitz Cano edo Jakoba Errekondorenak tarteko; Szenatokian ‘Txarriboda’ ikuskizuna taularatuko da eta egunari amaiera emateko kontzertua eskainiko du Plateruenan Esne Beltza taldeak.

La entrada Aniztasunaren festa hasi DA se publicó primero en durangon.com.

Christine Etcheversek egin du 51. Durangoko Azokako kartela.

36 egun falta dira Durangoko Azoka hasteko eta gaur bertan eman dira ezagutzera edizio honetako kartela, ildo nagusiak eta aurten izango diren berrikuntzak eta helburuak. 51. edizioak 670.000 euroko aurrekontua izango du, hau da, iazkoa baino %10a gutxiago.

‘Bizitzekoa DA!’ goiburuarekin abenduaren 2tik 6ra burutuko den edizioarekin “gazteei, nagusiei, haurrei, euskaldun berriei, zaharrei, euskal hiztunak ez direnei ere etortzeko eta Azoka bizitzeko” eskatu die Nerea Mujika Gerediaga elkarteko presidenteak.

Aurten, EKEk eta Gerediagak sinatutako hitzarmenak 10 urte betetzen dituela eta, Ipar Euskal Herriak leku eta indar berezia izango du Landako erakustazokan. Izan ere, “Ipar Euskal Herriko sorkuntzak Azokan duen presentzia bermatzea izan du helburu hamarkada honetako lankidetzak”, Mujikaren esanetan.

Hori dela eta Iparraldetik gerturatutako eskaintza “inoiz baino zabalagoa” izango dela azpimarratu du Mujikak eta aurten “30 ekitalditik gora izango ditugu teknologiari, zinemari, zabalkundeari, literaturari, musikari zein arte eszenikoei lotuta. Formatuak ere denetarikoak izango dira: hitzaldiak, mahai-inguruak zein ikuskizunak”.

Ipar Euskal Herriko presentzia aurtengo Azoka iragarriko duen kartelean ere nabarmenduko da, Baionan jaio eta Kanbon bizi den Christine Etchevers margolaria baita egilea.

Erakusketa Museoan

Etchevers Azokako kartela egiten duen Iparraldeko lehenengo sortzailea dela gogoratu du Mujikak eta Durangoko Arte eta Historia Museoak bat egingo duela Azokarekin artista lapurtarraren erakusketa hartuko baitu azaroaren 17tik urtarrilaren 10a arte.

Etcheversek “ohore handiz” jaso zuen enkargua eta berak diseinatutako obran “liburuak eta diskoak antzematen dira, pertsona bat agertzen da liburu baten azalean, beste pertsona bat liburutik ihes egiten, iraganetik eta ametsetatik ihes egiten…”, azaldu du. Aurtengo kartelak “Durangoko berotasuna eta pasioa” ere islatuko du, Azoka “dinamismoa, bizitasuna, beroa” delako artista lapurtarrarentzat.

Edizio honek izango duen beste ildo azpimarragarria irekiera egunean ospatuko den Ikasleen Egunari dagokio. Abenduaren 2a izango da ikasleei zuzendutako eguna eta Gerediagak beraien presentzia zein “belaunaldi berrietako euskaldunak kulturgintzaren ardatzean ipintzea” du lan lerroetako bat.

Helduentzako tailerrak

Antolatzaileek 6000 izen-ematetik gora jaso dituzte honezkero eta goizean zehar burutuko diren diziplina anitzetako hainbat tailer antolatu dira beraientzat. Arratsaldean  berriz, aurtengo beste berrikuntzetako bat nabarmenduko da, helduei zuzendutako tailerrak prestatuko baitira “esperientzia pilotu moduan”, Mujikaren esanetan. Batez ere euskara ikasten ari direnei zuzendutako ekitaldien artean Wikipedia maratoia edo hip-hop eta literatura tailerrak eskainiko direla aurreratu du.

Mujika eta  Etcheversekin batera Cristina Uriarte Eusko Jaurlaritzako Kultura sailburua, Ana de Castro Bizkaiko Foru Aldundiko Euskara zuzendaria eta Aitziber Irigoras Durangoko alkatea izan dira aurkezpen ekitaldian.

Jaurlaritzak Azokarekin duen konpromisoa berresteaz gain, “XXI. mendeko erronkei erantzuten” eta “jendearen eskakizunei egokitzen” jakitea eskertu dio Uriartek Gerediagari. De Castrok berriz, “kulturan egiten den gastua orainari eta etorkizunari begira egiten den inbertsioa dela” adierazi du. Irigorasek bere aldetik, bertaratzeko gonbitea luzatu die kanpotarrei eta iaz ospatutako 50. edizioaren ondoren aurrea egitea “erronka potentea dela” azpimarratu du.

La entrada Azokak Iparralderen presentzia sendotu eta inoiz gerturatu ez direnak erakarri nahi ditu se publicó primero en durangon.com.