Surrandien konpartsarekin bat egitera deitu dute Kriskitin, Txoritxu-Alai eta Tronperrik

Biharko ‘eguen zuri’ eta etziko ‘bariku argal’ ospatu ondoren, ‘zapatu regular’ deiturikoa jai egun gogoragarria bilakatzeko asmoa dute Durangoko dantzari eta dantzazaleek, larunbatean Surrandien konpartsa ibiliko baita herriko kaleetan.

Ekimen xelebre hori Durangoko karnabaletako ospakizun aipagarrienetakoa izango da. Hori dela eta, “betikotasunetik irten”, karnabal giroan murgildu eta ekimenean parte hartzeko gonbitea egin dute Kriskitin, Txoritxu-Alaia eta Tronperri dantza taldeko kideek.

Dagoeneko herriko dantzari, dantzazale eta gainontzeko lagunek prest dituzte auzolanean egindako kareta edo maskarak. Baita arranak, abarkak, puxikak eta enparauak eta hartza berriz, “iratzartzen hasita egongo da honezkero”, antolatzaileen esanetan.

‘Surrandi, surrandi, gaur Durangon nagusi’ aitzakia hartuta, larunbat eguerdian bilduko dira surrandi goiztiarrenak, triki-poteoarekin motorrak berotzeko asmoz.

Hitzordu nagusia baina, 18.00etan izango da Plateruena Kafe Antzokian eta bertan txokolate beroa hartu eta gero konpartsako kideek kalerik kale ibiliko dira Jaizale txistulari taldea eta Tabira musika bandaren laguntzarekin.

Kalejiran dantzatuko dituzten zazpi jauziak, fandango eta ariñ-ariñak edo Lantzeko zortzikoaz gain “ez da faltako Egiguren, Ertzillak eta Belaustegik Durangoko karnabaletarako sortutako musikarik”, konpartsako kideen esanetan. Ospakizuna Andra Mariko elizpean amaituko da arratsaldeko 20.00ak aldera.