Sormenari ateak zabalduz, ume eta gazteentzako Kultur Astea antolatu dute Iurretan

Jokoak, tailerrak, akrobaziak, zinea, balleta eta kirola izango dira nagusi Iurretako Udalak Ume eta Gazteentzako antolatu duen Kultur Astean. “Adiskidetasuna, talde lana, integrazioa eta euskara” ardatz harturik, artearen eta kirolaren erakustoki txiki bat bilkatuko da Kultur Etxea, ekainaren 23tik 27ra bitartean.

Iurretako alkateak, Iñaki Totorikaguenak, azaldu zuenez aurkezpenean, Kultur Asteko egitarau “zabala eta erakargarria” prestatzeko orduan, hainbat elkartek parte hartu dute: Anderebide Iurretako Emakumeen Elkartea, Gertasport, Kimuak aisialdi taldea, Olaburu pilota taldea, Durangoko Látelier dantza eskola eta Kemy eskulanak.

Bost egunetan zehar, 2 eta 8 urte bitarteko umeentzako ludoteka izango da. Gazteentzako, berriz, monopoly zein partxis bezalako jokuak antolatuko dira Kultur Etxeko terrazan. Birziklatze eta fofucha tailerrak ezezik, akrobazia agerraldiak, zinea, antzinako jokuak eta kirolak ere egongo dira.  Durangoko Látelier dantza eskolaren eskutik, ballet eta breake eta street dance tailerrak burutuko dira.

Egitarauari amaiera emateko, ekainaren 27an, Pablo Berasaluze, Ibai Zabala, Mikel Urruti eta Alexis Apraiz pelotari profesionalen eskutik, pilota, pala eta zesta-puntan arituko dira frontoian partaideak. Txokolatada eta erromeriarekin amaituko da aurtengo egitaraua.