San Rokeko 33 etxebizitzak alokairuan uztea aztertuko dute VISESAk eta EH Bilduk

Durangoko EH Bilduko zinegotziek eta Eusko Jaurlaritzak etxebizitza sustatzeko sortutako VISESA enpresa publikoko ordezkariek “San Roken esleitu gabe dauden 33 etxebizitza publikoak alokairuan uzteko aukerak” aztertuko dituzte.

VISESAko ordezkariekin Bilbon izandako batzarra, pasa den astean burutu zen, Durangoko EH Bilduk egindako eskakizunaren ondoren. Zinegotzi durangarren asmoa “Durangoko udalbatzak etxebizitzaz onartutako mozioa, eta bide batez, Durangon arlo honetan dagoen kezka” erakunde publikoari helaraztea zen.

Zinegotzi abertzaleak udaleko bilkuran gehiengoz onartutako mozioa erakunde publikoaren esku uztera joan ziren VISESAren egoitzara. Hain zuzen, “Durangoko udalak bere kabuz egin ez duena egitera”. Mozio horretan “San Rokeko babes ofizialeko promozioan oraindik esleitu barik dauden 33 etxebizitzak”, alokairuaren bitartez kudeatzea eskatzen da.

“Etxebizitza politika soziala lehentasuna da”

EH Bildurentzat “etxebizitza politika soziala lehentasuna da“. Eta ahalik eta etxebizitza gehien alokairuan durangarren esku jartzeko, beharrezkoa da “planteamendu orokor bat, Durangon garatu barik dauden lurzoru publikoak zein hutsik dauden etxebizitzen inguruan”.

Horrez gain, etxebizitza publikoak alokairuan kudeatzeko modu ezberdinak aztertu zituzten; hala nola, alokairu sozialak, babes ofizialeko alokairuak, Durangoko udalarekin hitzarmen bat sinatzeko aukera, eta abar.

EH Bilduko zinegotziek bat egiten dute VISESAko ordezkariek adierazitakoarekin, hain zuzen “edozein helburu lorgarria dela”. Horretarako, ordea, “ezinbestekoa da gaur egun EAJren udal taldean ez dagoena: egoera aldatzeko borondate politikoa”.