Portalekuak herritarren babesa jaso du asteburuan

Hainbat herritarrek bere babesa eman diote asteburu honetan Elorrioko ‘Portalekua’ herriko tabernari eta, era berean,  eraikinaren konfiskazioa agintzen duen Estatu espainiarreko Auzitegi Nazionalaren epaiaren kontra azaldu ziren.

Larunbateko eta igandeko ekitaldiak “Gure etxea da, herriarena!!” goiburuarekin burutu ziren eta bertaratzeko deialdia ostiralean banatutako ‘Gerrako harrapakina’ izenburua zuen orrian egiten zen. Bertan azaltzen zenez, Portalekuaren itxiera agintzeko “erakunde terrorista bat” finantzatzen zuela esaten zuten epaileek baina, “gaur egun oraindik, bankuei maileguak ordaintzen jarraitzen dugu!” baieztatzen zuten idatzian.

Auzitegi Nazionalak emandako epaiaren kontrako ekitaldiak larunbatean hasi ziren leihotik leihorako bertso saioarekin, ondoren egindako meriendarekin eta Portalekuari babesa emateko argazkia atera zen. Ondoren, eta igande goizean ere , musika ekitaldiak eta poteo girotua egin zen eta igande arratsaldean  dokumental emanaldia eta Inguru abenturak egindako slak-line erakusketa egon ziren.