Plastikoaren kalteak

San Frantzisko bere zubiagatik da entzutetsu mundu osoan baina, horrez gain, badu aipatzeko beste motibo bat, hain zuzen Estatu Batuetako lehen hiria izan baita plastikozko ur botilen salmenta galarazten instalakuntza eta jarduera publikoetan.

Plastikoaren kalteaz jabeturik, plastikozko ur botilak saltzea debekatzen duen udal araudia hilabete honetan onartu du eta eraikin publikoen barruan antolatzen diren jarduera guztietarako berehalako debekua ezarri du. Gainontzeko ekitaldietarako, kanpoan egiten direnetarako adibidez, 2016 jarriko da araua indarrean. Kirol eta kultura gertakizun handietarako, esate baterako maratoi edo antzekoetarako 2018ra arte izango dute egokitzapenak egiteko aukera.

Beste adibide bat Australiako Bundanoon turista herrian aurki dezakegu, 2009an munduko lehen herri izan zen ur botilen salmenta guztiz debekatzen. Harrezkero Concord, Massachusetts, eta Estatu Batuetako zein Kanadako hainbat campusetan debekatu izan dira botilok. Europan Venezia izan da iturri publikoen erabilera bultzatzen eta botiletako ur kontsumoa murrizten aitzindaria.

Neurri hauek ez dira debeku hutsak, baizik eta, iturri publikoak berriztatzea eta herritarrak euren altzairu herdoilgaitzezko edo kristalezko botilak betetzera animatzeko kanpainez lagundurik egoten dira. Ekitaldi jendetsuetan pitxarrak eta kristalezko edalontziak jartzen dira.

Gurean ostera, munduko herri aurreratuen kontrako norabidean goazela dirudi. Adibiderik argiena oraintsu onartutako araua, zeinek jatetxeetan berriz erabiltzeko olio ontziak debekatzen dituen, horren ordez bezero bakoitzarentzat erabili-botatzeko banakako ontzietara joz. Argi dago arau horren atzean planetarekiko erantzukizun eza eta interes ekonomikoak daudela.

Nago beste tren bat hartu beharko dugula, berandu baino lehen, gure planeta plastikoz bete orduko bide berriak jorratuz. Ez da hain zaila, herri guztietan baititugu iturriak eta sarritan etxera heltzen zaigun ura ere eta baita erosten duguna baino eskasagoa.

Birziklapenik onena, hondakinik ez sortzea.

Iturria: elplasticomata.com

Marisa Barrena psikopedagogoa da