Olgetan

Txikitan hainbat ordu eder pasatzen genduzan olgetan. Eskolako errekreoan zein eskolatik urten ostean. Sasoian sasoiko jokoak egoten ziren. Ez dakit zerk edo nork ezartzen zituen joko-sasoiok, baina seguru asko eguraldiak izango zuen eraginen bat.

Gure eskolan neskak eta mutilak berezituta egoten ginen, halan da ze, jolastoki bana izaten genuen, antzerako samarrak ziren neurrian. Sokasaltoan, taian, kromoka, inkean, ziban, tortoloxetan, kubike (ezkutaketan), 1-2-3 karabi-karaba, iturrietan eta txorro morroka olgetan gendun. Ofizio jolasak be gure gustukoak izaten ziren; dendari, etxeko andre, erizain, edo praktikante be izaten ginen gure jokoetan. Edozelan be, olgeta gehienak taldean egiten genduzan

Eskolatik kanpo be antzekoak izaten ziren gure denbora-pasak. Baserriko atartean, karrajuan zein ezkaratzean olgetan gendun, batzuetan etxe baten, hurrengoan bestean. Txirri-txirriak arrapetan  edo txorien habiak topetan be ibiltzen ginen. Ume batzuk trebeak ziren euren jostailuak egiten be: punteria lantzeko tiragoma, aldatza behera joateko goitibera.  Herriko jaietan, haurrentzako jolas bereziak antolatzen ziren: zaku-karrerak eta aulki-jokoa, besteak beste

Gaur egun guztiz bestelakoak dira kontuak. Lehengo joko eta jolas asko baztertu eta ahaztu egin dira. Izan be hainbat eta hainbat joko didaktiko dago. Umeak txiki-txikitatik lantzen dabe psikomotrizitatea, koloreak, zenbakiak, izenak. Guk ez geneukan hainbat joko ederren jabe dira, zorionez. Horrez gain tailerrak be antolatzen dira umeek irudimena landu dagien eta jolasean goza dagien.

Halere, azken boladan behin baino sarriago ikusten dudan egoera batek kezkatzen eta tristatzen nau. Ume askok euren makinatxoarekin baino ez dabe olgetan. Taldean egon arren, nor bere makinarekin ibiltzen da, ondoan duenari inolako arreta edo jaramonik egin barik. Taldean egon arren, bakarrik olgetan dabe. Ezer onik ekarriko ote dauzku olgetako era horrek? indibidualismo horrek?

Nire ustez, aro barrian gagozen honetan be,  komeni jaku, besteak beste,  Jean Piaget edota Maria Montessoriren teoriak birpasatu edo irakurtzea, hain zuzen,  jolasak haurraren garapenean duen garrantziaz jabetzeko eta gure umeen garapen hori behar dab moduan jagoteko.

Marisa Barrena psikopedagogoa da