Erretorika-shop

Unibertsitatearen unibertsoa, hain justu orain dela 10 urte zapaldu nuen lehenengo aldiz unibertsitatea. Oraindik Txoerierriko autobia berria egin gabe zegoen eta Bizkaibus horian Malmasinetik barrena joaten ginen Leioara ikasle inuzenteak, ni Publizitate ikasketak egitera. Txepeltasun hori labankada bortitz batekin ebaki zuen klasean sartu eta lehenengo segundoan, lehenengo eguneko lehenengo irakasleak: “badakizue non sartu zareten?”. Ahoa zabal-zabalik ginen gehienak, nork euli gehiago atrapatuko zituen lehian. “Ikus-entzunezkoen munduan ez dago zuen beharrik”, egotzi zigun.

Irakasle hura gu baino inuzenteagoa zenaren ondoriora heldu naiz hamarkada borobil hau igaro ostean. Gela hartan ginen ikasle gehientsuenok ez genion kasurik egin eta ia denak hari gara komunikazioaren munduan bidea egiten; xumea, bai, baina bidea egiten, bakoitzak berea.

Gogoan dut urte hartan egin nuela nire lehenengo hotmail helbide elektronikoa, unibertsitatean. 30 ordenagailu genituen ehunka ikaslerentzat. Orain konturatzen naiz arrez gero ordenagailuak eta internetek gure bizitzan eta gure ogibidean hartu duten garrantziaz. Egunkariak, oraindik ere, goizaldeko errotatiben lanaren emaitza ziren. Eta beste irakasle bati otu zitzaion esatea, urte gutxiren buruan, paperezko edizioak desagertuko zirela. Horrek ere ez zuen asmatu.

Profetek ez zuten asmatu ezta ere telebistak irratiaren audientzia eta negozioa irentsiko zuela esan zutenean. Interneten sorrerak telebistazaleak, egunkarizaleak eta irratizaleak arduratu zituen. Baina hamar urte borobil hauen ostean ikusi dezaket telebistak, egunkariak eta irratiak jarraitzen dutela; eta guzti horien azoka, egia da, internet dela. Horrek komunikatzeko modua ere aldatu du: mezua laburragoa, ikusgarriagoa eta azalekoagoa. Baina funtsean, komunikatzen jarraitzen da, emozioak transmititzen, informazioa partekatzen… hitzarekin eta esaldiekin jolasten jarraitzen dugu: erretorika egiten eta erabiltzen.

Eta hain zuzen, erretorika lantzea, erretorika egitea eta erretorika erabiltzea gomendatu zidan irakasle batek unibertsitate garaian. Erretorika, ongi hitz egiteko edo idazteko artea eta prozedura multzoa. Hura bai profeta! Nire belaunaldiko ikasle gehienak horixe egiten jarraitzen dugu, irratian, telebistan, prentsan, edo guztiak biltzen dituzten komunikabide digitaletan. Aukerak behar izan ditugu, eta aukerak eman dizkigute. Eta hona hemen egunkari digital batek ematen didan lehenengo aukera. Pribilegioa, hamar urte beranduago hitzarekin jolasean jarraitzeko aukera izaten jarraitzea. Eskertzekoa da.

Internet erretorika biltegi erraldoia bada, hemen hasten den Erretorika-shop hau erretorikaren denda txikia izango da. Hitzak baduelako oraindik zer landu, zer erosi eta zer saldu.

Julen Orbegozo kazetaria da