Bortxatzaileei barkamena Turkian

Aspaldi honetan Turkiatik datozen berriak negargarriak dira. Erdoganen atzapar zapaltzailea mugagabea da. Orain artekoak gutxi balira, egun hauetan ezagutu dugunak ikara eta dardara sortzen du.  XXI. mendean pentsaezina edo sinestezina dirudi. Hona hemen Parlamentuak lege bidez hartzear duen erabakia:

Adingabekoen bortxatzaileei kartzela zigorra parkatu egingo zaie, bortxatuarekin ezkontzen badira.

Turkiar emakumeak haserre, kalera irten dira, kikildu barik. Haien esanetan AKP alderdiak “adintxikikoen bortxaketa legeztatu nahi du”. Bidegabekeria hau salatzeko, hainbat hiritan irten dira kalera lege honen aurka. Erdoganen poliziek gogor eraso diete, emakumeen atxiloketak ere gertatu dira. “Emakumeak kartzelara eta bortxatzaileak kanpora”. Hau da hau!

Tamalez Turkian bortxaketa kasuak ez dira bakanak. Aurten adingabeen 16.957 bortxaketa kasu erregistratu dira, eta urtea ez da oraindik amaitu. Sustrai islamistak dituen AKP alderdiak ostera, neskatoen mesedetan hartu duela erabakia dio. Mesedetan? Nork sinestu dezake argudio hori?

Lege honekin salaketak gutxitu egingo dira, seguru asko. Nor ausartuko da salaketa jartzen? Nork ezkondu nahi izango du bere bortxatzailarekin? Beste askotan lez, neskatoak galtzaile eta bortxatzaileak nahi dutena egiteko libre, kartzela arrisku barik.

Turkiar feministek dioten bezala lege honekin “adintxikikoen bortxaketa legeztatu” egingo da, nik uste.

@AndereakDurango @durangondigital berri pozgarria. Bertan behera geratu da gaur onartzeko zen lege proposamena, emakumeen borrokari esker

— Marisa Barrena (@MarisaBarrena1) 23 de noviembre de 2016

Marisa Barrena psikopedagogoa da