Astegoien beroa

Eguraldi ederra iragarri dute
astegoienerako, eguzkia izango ei dugu nagusi
Euskal Herrian eta eguraldia ez eze, bestelako
berotasuna ere igartzen da inguruan, bai azken
egunotan Errepublika zaleen aldarriek
eragindakoa, bai Gure Esku dago ekimenak
bilduko dituen milaka herritarrek dakarkiguten
askatasun oihuak sortutakoa.

Zapaturako Estatu ereduaren inguruko
erreferenduma eskatzeko eta Borboiko Felipe
koroatzeren kontrako kontzentrazio edo
agerraldiak deitu dituzte sare sozialen bidez
zenbait alderdik beste hainbat hiriburutan.
Errepublikaren aldekoek askatasuna,
berdintasuna zein anaitasuna gogorarazten
dizkigute, beste askok utopia hutsa dela dioten
bitartean.

Domekan berriz,
Durango eta Iruinera bitarteko 123 kilometroak
lotuko dituen gizakatea osotuko dute
erabakitzeko eskubidearen alde dauden
sentsibilitate anitzeko milaka herritarrek. Izan
ere, euskaldun askoren ustez ???nazioa gara eta
erabakitzeko eskubidea dugu???. Badago ekimen
hau be hutsal edo alferreko ikusten duenik ere.

Halan zein holan,
aldarrikapenetarako sasoi aproposa delakoan
nago. Izan be, badoa Juan Carlos, Francoren
oinordekoa, hainbat lotsabakokeria egin
ostean. Hil honen 18an koroatu nahi dute PP
eta PSOEk haren seme Felipe. Gure esku dago
Feliperi eta haren defendatzaileei muzin egitea
horretarako hainbat arrazoi baitaude.

Nire iritziz, Borboien gastuetan
xahutzen dugun diruaz hainbat gose kenduko
genuke, etxegabeentzat hainbat aterpe
atonduko edota, hainbat mediku eta irakasle
ordaintzeko lain izango genuke.

Marisa Barrena psikopedagogoa da