Musika eta dantza izango dira Kainaberaren Jaialdian

Azken urteetan ohikoa bilakatu den Elkartasun Jaialdia ospatuko da Elorrion gaur, eguerdiko 12.00etan hasita, eta bertan herriko hainbat musika eta dantza talde eszenaratuko dira. Gobernuz Kanpoko Kainabera erakundeak antolatutako ekimenerako sarrera borondatea izango da eta lortutako dirua Kolonbiako Bogotá hiriko auzo txiro bateko jantoki komunitarioei laguntzeko bideratuko da.

2014ko jaialdia Arriola Antzokira bueltatzen da eta bertan Elorrioko hainbat talde izango da. Agerraldian Besaide dantza taldea, Elorrioko txistulariak, Elorrioko Lourdesko Ama ikastetxea, Arantxa eta Pantxo, Garamenditar Augustin Musika Eskola, + ke kuerdas musika taldea, Bixente Beitia eta Plazako dantzen ikastaroko kideak izango dira.

Ekitaldian, musika eta dantza ikuskizunekin gozatzeaz gainera, Kainaberako proiektu baten berri emango da. Hain zuen, Bogotáko auzo txiroenetarikoa den Ciudad Bolivarren dauden jantoki komunitarioen egitasmoa.

Ciudad Bolivar auzoko biztanle gehienak euren lurrak utzi dituzte gerragatik eta pobreziagatik. Iaz, 250 pertsonak izan ziren elikadura zerbitzu horren onuradun. Astegunetan egoten da zabalik, eta jatordu bat eskaintzen dute elikadura premiak kontutan edukita. 5 urtetik beherako umeak, nerabeak eta pertsona nagusiak dira gehienbat bertan bazkaltzen dutenak. Bazkariez gainera, komunitateko pertsonentzako bost formazio tailer eskaini dituzte, nutrizioa, higienea, bizitza ohitura osasungarriak eta auzolanaren inguruan.