Musika, dantza eta dastaketa ugari izango da Mendiolako San Kristobal jaietan

Musika, dantza eta dastaketak nagusituko dira ostegunetik aurrera Abadiñoko Mendiola auzoan ospatuko dituzten San Kristobal jaietan. Auzoko jai batzordeak prestatutako egitaraua arratsaldeko 19.00etan hasiko da, donien atxa altxatzen dutenean, eta ondoren trikitilarien saioa izango da. Gauean Fredi Paia eta Arkaitz Estiballes bertsolarien ekitaldia egongo da eta ondoren berakatz zopa dastaketa izango da auzokoentzat.

Goizeko 11.00etan izango den meza nagusiarekin hasiko da ostiralerako prestatutako egitaraua eta 12.30ean Abadiñoko dantza taldearen ekitaldia egongo da eta gazta, orgia eta ardoa banatuko dira. Arratsaldeko 16.30etan mus txapelketako kanporaketak abiatuko dira eta gaueko 22.00etan Rude Pride, Adrenalized, Sustrajah Band eta Dirty Brothers taldeen kontzertu hasiko da.

Kotxe klasikoen erakusketaren irekierarekin hasiko dituzte larunbateko ekitaldiak 13.00etan eta ondoren bakoitzak bere maletarekin egindako bazkaria egongo da. Arratsaldean umeentzako jolasak eta tortilla txapelketa egongo dira eta gauean Luhartz taldeak girotutako erromeriaz gain bolo txapelketa egongo da. Goizaldean txokolatea bizkotxoekin banatuko da.

Igande eguerdian Mendiolako Alluitz dantza taldearen saioa iragartzen da eta jarraian ugasixo txapelketa eta errifaren zozketa egingo dira. Donien atxa jaitsi dute ondoren eta horrekin agurtuko dituzte aurtengo jaiak.