Martxan da Abadiñoko Gabonetako Erakusleiho Lehiaketa

Abadiñoko Merkatari Elkarteak (AME), Abadiñoko Udalaren laguntzarekin, Gabonetako Erakusleihoen Lehiaketa antolatu du hirugarren urtez. Tokiko saltokietako erosketak dinamizatzea, establezimenduen sormena aitortzea eta udalerrian Gabonetako espiritua sustatzea da lehiaketa honen helburua.

Aldi honetan, udalerriko 11 establezimenduk parte hartuko dute lehiaketan: Abarketeruena Taberna (Iturritxo, 6), Goxoa taberna (Trañabarren kalea, 9), Enxebre Ogidenda (San Andres, 8), Farmazia Miren Itziar Sánchez Robles (Urbitarte poligonoa, 4), Federópticos Apraiz (Trañabarren kalea, 13), La Costura de Mariaje (San Andres, 2), Larrano Taberna (Iturritxo, 7), Mapfre Matiena (San Prudencio, 2), Matiena Farmazia (Trañabarren kalea, 15), Xarma Fisioterapia (Trañabarren kalea, 27) eta Zure Denda (San Prudencio, 6).

Abadiñarrek bi eratara bozkatu ahal izango dute euren erakusleiho gogokoenaren alde, abenduaren 23ra bitarte: establezimenduetan bertan dauden boto-orrien bidez edo honako esteka honen bitartez.

Bozka gehien jasotzen dituen erakusleihoak 500 euroko saria jasoko du erosketa txarteletan, eta, bigarren bozkatuenak, berriz, 300 euro jasoko ditu erosketa txarteletan. Bi sari horiez gainera, lehiaketan parte hartzen duten herritar guztien artean, 200 euro zozketatuko dira erosketa txarteletan establezimenduetan botoa presentzialki eman dutenen artean, eta beste 200 euro online bozkatzen dutenen artean.

Sari banaketa eta azken zozketa

Astelehenean, abenduaren 29an, egingo da sari banaketa. Boto gehien lortu dituzten erakusleihoei sariak banatuko zaizkie, eta parte hartzaile guztien artean zozketa egingo da.

AMEk herriko saltokietan zehar ibiltzera, erakusleihoez gozatzera, tokiko merkataritza kontsumitzera eta bozketetan parte hartzera gonbidatu nahi ditu herritarrak.

Edurne Maguregi Ekonomia Sustapen eta Enplegu zinegotziak, bere aldetik, parte hartu duten establezimendu guztien ahalegina eta ilusioa azpimarratu ditu: “Beste urte batez, Abadiñorekiko duzuen konpromisoa erakutsi duzue. Lehiaketa honek, Abadiño edertzeaz gain, gure merkataritza sarearen grina eta konpromisoa islatzen ditu, harro egoteko modukoa da komunitate osoarentzat”.