Mankomunitateak Abadiñoko Eguneko Arreta Zentroaren araudia onartuko du iraileko osoko bilkuran

Durangaldeko Mankomunitatea eta Abadiñoko Udala elkarlanean ari dira adinekoentzako eguneko arreta zerbitzuaren araudia ezartzeko, Abadiñon kokatuko den zentroaren funtzionamendua eta sarbide baldintzak arautzeko helburuarekin. Araudi hau Durangaldeko Mankomunitateak datorren astean ospatuko duen osoko bilkuran onartuko da, eta Durangaldeko gizarte zerbitzuen eskaintza indartzeko urrats garrantzitsua izango da.

Mendekotasun arinean dauden adinekoen autonomia pertsonala sustatzea, gizarte isolamendua prebenitzea eta eguneroko bizitzan laguntza eskaintzea izango da zerbitzuaren helburua. Araudiak genero ikuspegia eta ekitate printzipioak txertatzen ditu, eta lehentasunezko sarbidea bermatzen du indarkeria matxistaren biktima diren emakumeentzat edo gizarte bazterkeriako arriskuan daudenentzat.

Araudiaren arabera zerbitzua astelehenetik ostiralera eskainiko da, gutxienez 15 orduko intentsitatearekin astean, eta otordua barne hartzen bada, egunean ordubete gehiago luzatuko da. Higiene pertsonala eta gizarte heziketa tailerrak barne hartuko ditu, eta beharrezkoa den kasuetan erabiltzaileentzako garraio egokitua eskainiko da.

Zerbitzu hau martxan jartzeko hurrengo urratsa, araudian oinarritutako pleguak zehaztu eta esleipen publikora ateratzea izango da.

Prezio publikoen eguneraketa

Zerbitzu berri honen arautegia lantzearekin batera, erabiltzaileek ordaindu beharreko prezio publikoa zehazteko lanketa gauzatu da. Prozesu hau Durangaldeko Amangomunazgoak eskaintzen dituen zerbitzuen prezio publikoak eguneratzeko baliatu da eta ordentza berriak erabiltzaileen ahalmen ekonomikoa kontuan hartu, eta salbuespen eta hobariak aurreikusiko ditu egoera zaurgarrian dauden pertsonentzat.

Durangaldeko Mankomunitateak eta Abadiñoko Udalak, Idoia Otaduy presidentearen eta Mikel Urrutia alkatearen hitzetan, “araudi hau gizarte zerbitzuen kalitatea eta irisgarritasuna hobetzeko tresna izango da, eta adinekoen ongizatea eta eskubideak bermatzeko konpromisoaren isla da. Gure erakunde publikoetatik elkarlanean jarraituko dugu egitasmo hau egi bihurtzeko”.