Maialen Arregik egindako kartelak iragarriko ditu aurtengo Ferixa Nausikoak

Irailaren 5etik 13ra Elorrion ospatuko diren Ferixa Nausikoen jaiak Maialen Arregi Ganboak egindako kartel batek iragarriko ditu. Elorrioko Udalak deitutako lehiaketara 13 kartel aurkeztu ziren eta irabazlearen aukeraketa herri-epaimahaiak eta epaimahai teknikoaren artean egin da.

Arregik ‘Ferixa nausietako uzta oparua’ deituriko kartela aurkeztu zuen eta irudiaren ardatza zaku handi bat da eta bertatik gainezka dauden osagaiak; azokako barazkiak eta loreak, abarkak, jaietako zapia eta kamiseta koloretsua, besteak beste.
 
Lehiaketara aurkeztutako 13 kartelak Iturri Kultur Etxeko sarreran izan ziren ikusgai ekainaren 3tik 20ra bitartean eta bertaratutako edonork zuen botoa emateko eskubidea. Ondoren, Udaletxeko, jai batzordeko kideek eta arte grafikoetako profesionalak bildu ziren eta beraien erabakia eman zuten, kontuan hartuta aldez aurretik herritarrek emandako bozkak.

Arregiren kartela jaietako kartel legez erabiltzeaz gain, esku-programaren azala ere izango da eta, lan irabazleagatik 500 euroko saria jasoko du.