Lourdes Unzuetak irekiko ditu Andraguneak antolatutako solasaldi dialogikoak

Durangoko Andraguneak solasaldi dialogikoak antolatu ditu aurten ere eta gaur, azaroak 13, arratsaldeko seietan hasiko den lehenengo ekitaldiko protagonista Lourdes Unzueta idazle durangarra izango da, egilea bertan dela. Ixone Aroma eta Marisa Barrenak bideratuko duten saioa, aurten ‘Bizkaiko emakume idazleak’ ardatz hartuta izango diren bost ekitaldietatik lehena izango da.

Aurtengo solasaldi dialogikoak irekiko duen saiorako Unzuetaren obrako hiru lan aukeratu dituzte antolatzaileak. Bi ordu iraungo dituen ekitaldian ‘Uharrak zure begietan’ liburuko ‘Abiadura handiko trena’ testua, BizkaIdatz lehiaketan lehen saria irabazi zuen ‘Haragi minetan’ eta Bidai kronika saria eskuratu zuen ‘Gata lurmuturretik, agata harribitxitik’ idatziak aztertuko dituzte.

Durangoko Andraguneak zenbait emakume idazleren lanak irakurri eta komentatzeko iaz egindako ekimenean, Kristina Mardaraz eta Erika Lagoma bertsolariak eta Julene Azpeitia, Errose Bustintza, Arrate Mardaras, Leire Bilbao eta Mila Salterain idazleen testuak izan ziren protagonista.

Antolatzaileen esanetan “plazera izan zen gutariko askorentzat sortzaileen lanak irakurtzea”. Gainera, “egileekin izandako zuzeneko elkarrizketak, euren obrara hurbiltzeko gogoa areagotu zigun, Kristina Mardaras, Leire Bilbao, Arrate Mardaras eta Mila Salterain sortzaile eta idazleak gurekin izan baigenituen”, antolatzaileen esanetan.

Hala ere, iazko solasaldietan parte hartu zutenek urrats berri bat ematea eta hurrengo ediziorako, aurtengoa alegia, urteko hitzordu guztiak ‘Bizkaiko emakume idazleak’ idatzitakoaren inguruan mintzatzeko erabakia hartu zuten.

Solasaldiotan parte hartzeko asmoa dutenek, izena eman behar dute aldez aurretik Andragunean bertan edo 944657092 edo 699872395 telefonoetan, eta antolatzaileak aztertuko diren testuak bidaliko dizkiete.