Lauaxeta Ikastolako ikasle bat, Europear Gazteen lehiaketako azken fasean izango da

Aitor Rodríguez, Amorebieta-Etxanoko Lauaxeta Ikastolako ikaslea, Europear Gazteen Parlamentuko lehiaketako azken fasera sailkatu da. Sailkapen honekin, iazko bide onari ekin dio Lauaxeta Ikastolak.

Joan zen apirilean, ikastolako ikasleak Bilbon aritu ziren aurkezpenak defendatzen beste 20 ikastetxeekin batera. Ingelesez eta 3 minututan, europar legediaren inguruko gai ezberdinez aritu ziren, hau da, inmigrazioa, energia, kanpo eta barne politika eta ekonomia inguruan.

 Ekitaldi honetan egindako lan onaren ondorioz, Rodríguez hautatua izan da azken fasera joateko. “Momentuz ez dira defentsarako egunak ezagutzen, ezta hiria ere. Baina iaz azaroan izan zen Tallinen”, aurreratu dute ikastetxetik. Lauaxeta Ikastola esperientzia honetara iaz aurkeztu zen lehenengoz, eta euskal ikastetxe bakarra izan zen Europa mailan.

“Norberen ideiak adierazi eta defendatzeko, bestearenganako errespetuaz eztabaidatzeko, beste hizkuntza batetan adieraztea eta talde-lanerako , orain eta etorkizunean, gure gazteek lan arloan zein beste edozeinetan murgiltzeko eta azken baten gure gizartea gidatzeko dituzten gaitasunak dira”, azpimarratu dute Lauaxeta Ikastolatik.

ZORNOTZAN. Amorebieta-Etxanoko albisteak