Lauaxeta Ikastola musikaz blai Señeak Bizkaia Rock Kanpusaren bigarren edizioan

Lauaxeta Ikastolak hartu du aste honetan Señeak Bizkaia Rock Kanpusa musikaz eta aisialdiaz betetako egonaldia. 14 eta 17 urte bitarteko Bizkaiko 22 nerabe ari dira parte hartzen, igandetik, musika-praktika eta talde-lanean oinarritutako esperientzia paregabe batean. Bihar, apirilak 10, kontzertu handi batekin amaituko da Zornotza Aretoan, Amorebieta-Etxanoko Udalaren laguntzari esker.

Aurtengo parte-hartzaileak Bizkaiko hainbat herritako musikari gazteak dira —Elorrio, Lekeitio, Gernika, Zornotza, Bilbo, Berriz, Lemoa, Usansolo, Sopela, Otxandio, Mungia eta Getxotik etorriak— eta rol anitz dituzte: gitarra-jole, abeslari, teklista, bateria-jole eta baxu-jole.

Ekimen hau Bizkaiko Foru Aldundiak, Señeak elkarteak eta Lauaxeta ikastolak antolatu dute elkarlanean. Iaz baino eskaera handiagoa jaso bada ere, antolatzaileek 22 parte-hartzaileren muga mantentzea erabaki dute, «egonaldiaren kalitatea bermatzeko», Señeak elkarteko arduradunek azaldu dutenez.

Señeak elkarteko Alex Sardui pozik agertu da lortutako erantzunarekin: “Bizkaian musika zaletasuna eta talentua bizirik daude; gero eta eskari handiagoa eta maila altuagoa dugu. Kanpus honek musikak eskaintzen dituen onurak eta aukerak gazteei gertutik erakustea du helburu.”

Euskara, Kultura eta Kirol diputatu Leixuri Arrizabalagak, bere aldetik, nabarmendu du iazko esperientziaren balorazio “oso positiboa” izan zela: “Gazte, irakasle eta gurasoen aldetik jasotako harrera bikainak erakutsi zuen ekimenaren arrakasta. Aurten, esentzia hori mantentzea izan da gure xedea, baina berrikuntzak gehituta esperientzia are aberatsagoa egiteko.”

Zornotza Aretoan azken kontzertua

Egonaldia bihar, apirilak 10, amaituko da kontzertu berezi batekin Zornotza Aretoan, Udalaren laguntzari esker. Bertan, aste osoan zehar ikasitako guztia erakutsiko dute irakasleekin batera eta euren sormena eta talde-lana erakutsiko dute kontzertu handi batean.

Emanaldi honek amaiera bikaina emango dio musika esperientzia honi, eta aldi berean, Bizkaiko musika hezkuntza eta sormenak duen indarraren erakusgarri bikaina izango da.