Ixone Aromak Mendiak Hurbilduz film laburren bigarren lehiaketa irabazi du

Ixone Aroma durangarrak egindako ‘Hutsunea’ lanak irabazi du Mendiak Hurbilduz ekimenak antolatutako II. laburmetraia lehiaketa. Lehiaketaren sari banaketa Plateruena Kafe Antzokian ostiralean egindako saio ikusgarri baten egin zen, bertan Olivier eta Nicolas Favresse anaiak eta Sean Villanueva izan zirela, besteak beste.

‘Hutusunea’ pelikulako protagonista gorpuzten duen Aitor Garitaonandiak ‘Ajillo’k, eskalatzea gogo duen kirolaria da baina hanka bat apurtu ondoren hilabeteak daramatza etxean; geldirik. Protagonistak “eskalatzeko beharra sentitzen du” eta bere zaletasuna egin barik egoteak ‘monoa’ eragiten dio. Hala ere “pelikulak amaiera zoriontsua du”, Aromaren esanetan.

Aromak bi arratsaldetan filmatu zituen pelikularen irudiak tablet batekin. Ideia lantzeak berriz lan gehiago eman zion. “Lehiaketara aurkeztutako beste pelikula batzuk kalitate gehiago” izango zutela onartzen badu ere, gogora dakar oinarrietan argi jartzen zuela “aintzat hartuko zirela ideia edota istorio bat garatzea”.

Irabazlearen asmoa ez zen inondik inora lehen saria irabaztea. “Iaz hiru edo lau lan bakarrik aurkeztu ziren eta niretzat garrantzitsuago zen lehiaketara aurkeztea eta beste zaletu batzuk parte hartzera animatzea”.

Aromak denbora gutxitan ikus-entzunezko lehiaketetan lortzen duen bigarren saria da. Iragan urrian K-Movie lehiaketako bigarren saria lortu zuen, Durangoko beste bost lagunekin elkarlanean egindako ‘Zaunk’ lanarekin.

Orain lortu duen garaipenagatik 150 euroko balea jaso zuen Atxarte mendiko dendan materiala hartzeko. Bigarren saria Álex Ruiz Gabina bilbotarraren ‘Ecos’ lanarentzat izan zen eta egileak 150 euroko balea jaso zuen Merkasport dendan Diamir materiala hartzeko.

Sari banaketa aurretik Atxarte Bizirik! ekimenak 2015erako antolatutako ekimenen berri eman zuen eta lehiaketara aurkeztutako zortzi film laburrak eman ziren. Ondoren Olivier eta Nicolas Favresse anaian eta Sean Villanuevaren diapositiba emanaldia izan zen eta gaua borobiltzeko Favresse anaien eta Villanuevaren musika ekitaldia izan zen, hirukoarekin batera Ander Ertzilla ere oholtzan izan zela.