Heldu eta umeendako ipuin kontaketak izango dira Durangoko Liburutegian

Durangoko Udal Liburutegiak bi ipuin kontaketa antolatu ditu urtarrilerako. Lehen ekitaldia helduei zuzenduta egongo da eta bigarrena umeei. Saio bian doan izango dira.

Helduei zuzendutako saioa datorren ostiralean izango da, urtarrilak 23, arratsaldeko 19.00etan eta ekitaldiko kontaria Bego Alabazan izango da. Gaztelaniaz izango den kontaketaren izenburua ‘Cómos y porqués’ (Arrazoien bila) da eta berbaldian “Zergatik gara horren korapilatsuak?”, “Zeintzuk dira gizon eta emakumeen arteko harremanen arrazoiak?” edo “Zer dela eta ezin dut txakurrik jasan?” bezalako galderen arrazoiei eta zergatiei buruz mintzatuko da.

Ipuin desberdinez baliatuta, galderei erantzungo die Bego Alabazanek, azken finean “ipuinak gizakion arrazoien beharrari erantzuteko” sortuak dira eta. Gizakiek egindako galderei erantzuteaz gain “norberak behari dituen galderak ere aurki ditzala” espero du kontatzaileak.

Haurrentzako iragarritako saioa berriz, urtarrilaren 31n izango da eguerdiko 12.00etan eta berau 3 eta 8 urte bitarteko umeentzat zuzenduta dago. Rosa Martínezek euskaraz eskainiko duen ekitaldian ‘Koloreak’ ikuskizuna izango da entzungai.