Gazte lokalen erabiltzaileek burutuko dituzten ekimenak babesteko deia luzatu du Bilduk

Pinondo Etxea “txiki” gelditu zen gazteen lokalen inguruko informazioa emateko larunbatean burutu zen asanbladan. Izan ere, 20 gazte lokaletako 50 ordezkaritik gora  bildu ziren Bilduk egindako deialdian. Asanbladatik sortutako mugimenduari “gure ongietorririk beroena adierazi nahi diogu eta gazte lokalen erabiltzaileak burutuko dituzten ekimen guztietan parte hartzeko deia luzatzen dugu”, aurerratu dute Bildutik.

Gazteen lokalen inguruan, Udalaren inplikazio falta agerian geratu dela salatu du Bilduk. “Herriarekiko hurbiltasun eza, bulegoetan eskutatzen direnak dira parte hartze prozesurik nahi ez dutenak, erosogo bizi direlako”, gaitzetsi du talde abertzaleak.

Alde honetatik, mota honetako ordenantzak inongo parte hartzerik gabe martxan jarri dituztenei eta etorkizunean jarri nahi dituztenei “inertzia horrekin amaitzeko” eskatzen diete.

Gazteen “ezadostasuna”

Gazte lokalekin ezezik, beste esparru guztietan ere berdina gelditzen dela gaitzetsi du Bilduk, aurrekontuen eztabaida adibide bezala jarriz, eta  parte hartzearen aldeko apustu garbia egiten dute esparru guztietan.

Bestalde, gazte lokalak arautzen dituen ordenantzaren gainean Durangoko gazteek “ezadostasuna” adierazteko prentsaurrekoa emango dute bihar martxoak 14, arratsaldeko 20.00etan eta Udaletxe aurrean. Bertan, euren jarrera azaldu eta aurrerantzean burutuko dituzten ekintzen berri emango dute, “Ordenantza berria, gure erabakia” lemapean.

DURANGON. Durangoko albisteak