Gastronomia eta euskal tradizioekin agurtuko dituzte jaiak Elorrion

2014ko Ferixa Nausikoak bihar amaituko dira eta jaien azken bi egunetarako gastronomiari zein euskal ohiturei lotutako hainbat ekitaldi iragartzen ditu egitarauak.

Gaur Sukalki Eguna denez, Iturrizoro elkartearteak antolatutako lehiaketa gastronomikorekin hasiko da eguna. Antolatzaileek 120 talderen presentzia espero dute Aldatsekuan eta, bataz beste, 1000 lagunetik gora bilduko da bertan eguerdian izango den bazkarian.

Goizean zehar haur parkeak irekiko dira, Kimuak mailako futbol txapelketa izango da Elizalden eta kalez kale ibiliko da Bertzi Gazte Brass Band.

Kiroldegian izango diren Areto futbol partidekin eta kalez kale ibiliko den Taberna Ibiltariaren ekitaldiarekin abiatuko da arratsaldea. Bostak eta erdietan karrozen jaitsiera hasiko da Aldatsekua inguruan eta plazara heltzerakoan karrozen aurkezpena egingo da Oihan Vega Djaren laguntzarekin.

Gaueko hamarretatik aurrera 50. Idi Proba txapelketaren saioa izango da eta ordu erdi geroago Galartzauria inguruan piztuko dira aurten berriro ere ikusgai izango diren suzko erruberak. Ondorengo orduak musikarekin osatuko dira eta Urarkan Trío Medianochek joko du; txosnagunean Betagarri eta Iheskideren kontzertuak izango dira eta gaztetxean Dj Tron/p jarriko du giroa.

Bertsolarien saioa

Euskal ohiturak nabarmenduko jaien azken egunean, naiz eta egitaraua Kainaberak antolatutako Elkartasun jaialdiarekin abiatuko den. Eguerditik aurrera plazako frontoian izango den ekitaldian Afrika, Hego Amerika zein Euskal Herriko jakiak prestatuko dituzte.

Herri kirolak ere euren txokoa izango dute eta iragarritako saioan Bihurri aita-semeak eta Zelai aita-semeak lehiatuko dira aizkorekin, Joseba Ostolaza eta Udane Ostolaza harriekin eta Oskar Basatxu eta Laura Basatxuk erakutsiko dituzten Iparraldeko jokoak.

Arratsaldean, Igor Elortza, Sustrai Colina, Uxue Alberdi eta Eneko Abasolo ‘Abarkas’ bertsolarien saioa izango da eta jaiei amaiera emateko Xabi Aburruzagaren folk eta trikitixa kontzertua izango da.